博客

博客

以政治聒噪欲救黎智英「國際律師團隊」愧對專業

施梓山 2023年03月17日 20:30

施梓山︰「黎智英嘅律師團,以為掛住『外國』就可以挾外力以令香港屈服,無視法律程序,呢種諗法其實相當幼稚兼脫離現實。況且,真係律師又使乜怕打官司?而家法庭都未開審,就先打『國際政治牌』,企圖將司法案件政治化、國際化,用呢種旁門左道嘅政客做法,對得住『法律專業』呢四個字嗎?」



👇 記得Follow 我哋 👇

IG: instagram.com/silentmajority.hk/

FB: fb.com/silentmajorityhk

Weibo: weibo.com/u/6655322587

Youtube : youtube.com/silentmajorityhk

壹傳媒創辦人黎智英及其子黎崇恩嘅所謂「國際律師團隊」,繼1月要求英國首相出面營救黎智英嘅馬騮戲無疾而終之後,才相隔兩個月又再出招,要求聯合國人權事務委員關注黎智英牽涉嘅《香港國安法》案件。毋庸置疑,今次亦都只會係一齣白費工夫嘅馬騮戲。

黎智英被控串謀外國或者境外勢力危害國家安全嘅案件,已經排期喺今年9月25日開審,黎智英嘅「國際律師團隊」到咗呢個時候,仲妄想搞呢啲小動作,以為就救到黎智英逃避香港司法審訊,係唔係患咗時空錯亂症,以為今時今日嘅中國仲係19世紀任人魚肉嘅滿清王朝?以為仲可以濫用「治外法權」?今時今日仲有一啲所謂嘅外國律師,想喺中國香港特區玩呢一套引外力施壓、迫放人嘅伎倆,係咪應該好好重讀一下中國近代史?

話說黎智英嘅「國際律師團隊」今次將聯合國牽扯入案件嘅做法係馬騮戲,原因好簡單,黑白好分明。

首先,任何一個地方都有自己嘅司法制度,若有人涉嫌犯罪,就要接受當地嘅司法程序,呢個係一個國家嘅內政,不容外國干涉,聯合國作為國際機構亦冇權插手,否則就係不務正業。黎智英有冇犯罪最終要由香港法院定奪,並唔係由邊一個西方國家,或者邊一個國際機構說了算。

馬騮戲做多 會釀反效果

其次,黎智英嘅律師團,以為掛住「外國」就可以挾外力以令香港屈服,無視法律程序,呢種諗法其實相當幼稚兼脫離現實。況且,真係律師又使乜怕打官司?而家法庭都未開審,就先打「國際政治牌」,企圖將司法案件政治化、國際化,用呢種旁門左道嘅政客做法,對得住「法律專業」呢四個字嗎?

再者,用抹黑香港司法獨立和《香港國安法》嘅方法來幫黎智英脫身,除咗令人不齒外,更令人相當反感。黎智英嘅律師團隊想透過詆譭「香港司法不公」來增加勝算籌碼,其實最終只會變成自己打臉。去年10月公佈嘅《2022年法治指數》,香港法治喺全球嘅整體排名維持高位,喺東亞及太平洋地區位列第6,而喺全球140個國家和地區之中排名第22位,排名高過部分經常無理批評香港嘅西方國家。所以黎智英嘅律師團隊唔好當世人係傻嘅,香港嘅司法獨立同良好法治體制,係長年累積才有今日嘅聲譽,唔係靠佢哋抹黑幾句就可以救到黎智英。

仲有一樣嘢叫做適得其反,馬騮戲做得多,只會有反效果,引起更多人討厭,同時令更多人睇清事實。律師代表當事人打官司,爭取無罪或減刑係律師嘅角色同職責,呢點大家都明白。但前提係一切都要按照法律同司法程序,否則就唔係法治。但請問黎智英嘅「國際律師團隊」而家又做緊啲咩呢?玩政客嘅政治施壓同國際串聯,係唔係已經玩過龍?而且唔係一次半次,而係一而再。

黎智英有冇觸犯《國安法》,就由香港法庭審訊定奪。任何企圖透過司法以外嘅勢力同壓力,來達到幫助黎智英脫身嘅做法,都係不恰當,而且最終亦只會以失敗告終。專業嘅律師應該遠離政治,唔應該為咗利益而遠離法律。希望黎智英嘅所謂「國際律師團隊」早日清醒,回頭是岸。

 

原圖︰星島日報
https://std.stheadline.com/realtime/article/1725629/即時-港聞-壹傳媒股份被凍結-黎智英入稟申行使股票投票權被拒

投票已截止,多謝支持

發表意見

排列方式: