《公職人員宣誓條例》通過之後，政府終於落實區議員宣誓安排。

據知有關的宣誓儀式將分四次進行，首批是來自港島中西區、灣仔區、東區和南區的25個區議員，由民政事務局局長徐英偉擔任監誓人，今個星期五（10日）在北角社區會堂進行宣誓。

宣誓是一件嚴肅的事。但回歸後，在反對派變本加厲的操控下，本應莊重真誠的議員就職宣誓，經常淪為政治鬧劇，成為笑話。惡搞誓辭，含糊其詞，宣誓時扮鬼扮馬，陰陽怪氣，早已令香港成為國際笑話。

宣誓鬧劇 6人DQ

從前我哋笑台灣的議會成日做馬騮戲，但近年香港區議會和立法會上演的膠劇，更加不堪入目，令港人蒙羞。2016年反對派在立法會議員宣誓儀式上的過火「演出」，包括梁頌恆、游蕙禎的「支那」辱華、劉小麗的龜速宣誓等，6個宣誓玩嘢嘅議員自作自受被DQ，喪失議席。

香港議員宣誓儀式在反對派毫無底線的破壞下，早已喪失莊嚴。反對派議員帶頭破壞宣誓的規矩和莊重，除了教壞細路外，更敗壞了社會風氣。人必自侮然後人侮之，市民對議員的尊重當然亦不斷下降。

嚟緊嘅區議員宣誓，政府發出了10頁紙的邀請函，當中詳細列明的多項規定和要求，畀人嘅感覺就好像教小學生要知道什麼是規矩。區議員變成小學生，大家對佢哋缺乏信心，係邊個一手造成的？答案當然係反對派自己！冇佢哋長期以來將宣誓變成食生菜，政府又何需準備咁多頁紙，詳細列明宣誓儀式區議員需要遵守的規則？

這些規則包括：不得遲到早退、不可講粗言穢語、不可妨礙儀式進行、不可攜帶揚聲器、雨傘、頭盔等物品。而且衣着方面亦有清晰指引，講明所穿衣物不可展示政治化標誌或口號、不可穿破損衣物、泳衣、短褲、人字拖、涼鞋等等。違反者將被視為宣誓無效。

黃友會為糧支跪低？

嚴肅莊重場合，不應該講粗口，更冇理由著爛衫爛褲、泳裝或踢人字拖去出席……這些尊重典禮場合嘅常識，相信小學生都知道，但偏偏香港嘅反對派和攬炒派十分反智，經常做得出來，所以政府不得不畫公仔畫出腸，畫下小學生不得逾越的紅線和後果。這是典型的面係人哋畀，架係自己丟，完全係反對派自己咎由自取。

在本屆區議會479名議員之中，至九月初有260人已辭職，另外8人因為被拘禁或離港走佬等原因而喪失議員資格，全港剩下的區議員人數是211人，扣除建制派的59席和27名當然議員，剩下的攬炒派區議員約為120人。由於早前政府已經公布了參選資格的正面和負面清單，按照這些攬炒派的議員過往的言行，有人估計當中約有一半已經觸犯負面清單，就算宣誓亦將被視作無效。

這次區議員宣誓結果或非即時公布，但有攬炒派被DQ，將是大家可以預期的事。玩過龍，物極必反，係正常不過嘅事。

值得注意嘅係，有幾個涉嫌干犯《國安法》正在保釋，但為咗有糧出仍然尸位素餐嘅「糧支議員」，包括民主黨嘅涂謹申、鄺俊宇、灣仔區議員楊雪盈，會唔會為咗「糧支」，唔怕面懵出席宣誓儀式，大家一齊留意。不過，就算佢哋宣誓，你估市民和監誓人又會唔會信佢哋係真心宣誓？

嚟緊舉行嘅區議員宣誓，規矩罕有地寫得清清楚楚，而且講明「後果自負」，擺明就係為咗一班小學生嘅攬炒派區議員專門而設。做到區議員但係行為舉止仍然小學生，你話呢啲人做議員係咪嘥香港人嘅米飯？香港嘅反對派唔識得珍惜過去嘅寬容環境，凡事玩得太爛太盡，係時候要重新學規矩了。

原圖︰頭條日報

https://hd.stheadline.com/news/realtime/hk/1977600/即時-港聞-公務員宣誓-張建宗指公僕簽聲明展示忠誠承擔-標誌意義重大

https://hd.stheadline.com/news/realtime/hk/2133492/即時-港聞-宣誓DQ-區議員辭職潮持續-中西區黃大仙區議會僅剩三議員

投票已截止，多謝支持