中大最近又陷於政治漩渦之中，表面上爭議係由中大校董會改革方案引起，實則問題嘅核心係被黑暴尊稱「段爸」嘅中大校長段崇智，喺國安法嘅新時代下，卻仍然可以繼續把持中大校政。

隨着校董會主席查逸超在立法會上公開承認自己被架空後，中大的管治更加畀人一種針插不入，水潑不進，缺乏社會監督嘅不良觀感。

如果中大係一間企業，校長理應係負責管理公司日常嘅行政總裁，就算佢係董事會嘅一員，但估唔到呢個行政總裁居然夾埋下屬，架空校董會主席，連佢一年有幾多花紅，都唔畀主席知道……呢種事如果發生喺商業世界，根本就係天方夜譚，嗰位行政總裁早就被人炒魷，但中大嘅「妹仔大過主人婆」，卻仍然日日上演，試問風波又點會平息呢？

俗語話，蛇無頭而不行，中大依家最大嘅問題，係負責校務管理嘅段崇智唔適合當校長。

以中大校董會改革一事為例，此事對中大未來發展至關重要。但作為一校之長嘅段崇智竟然可以連續三次，以各種「理由」缺席立法會相關草案委員會嘅會議，實在令人震驚。

須知道中大係香港嘅一間公營大學，營運嘅經費每年數以億元計，錢從何來？全部都係香港人嘅公帑！所以中大最高管理層，如果連呢個最基本嘅事實都未搞清楚，以為一句「院校自主」，就可以逃避社會和民意代表嘅監察，當然會被人批評連幼稚園都不如。

喺出席立法會會議呢件事上，段崇智採取「鴕鳥政策」可謂判斷錯誤，令事件不斷發酵擴大，對中大帶來負面影響，實在難辭其咎。無論以乜嘢「理由」都好，校長多次拒絕到立法會出席會議，已變相係一種政治表態。呢種拒不合作，當立法會冇到嘅做法，就算係西方國家都會招致一面倒嘅惡評。所以，唔理係段崇智剛愎自用，抑或佢真係將中大當成「獨立王國」也好，客觀效果都係佢已為中大帶來傷害。

至於「身教」就更加唔好講！面對困難迎難而上，唔係我哋成日教育下一代嘅咩？點解為人師者，遇到同樣事情嘅時候，卻選擇逃避？

正所謂「上樑不正下樑歪」，中大副校長兼秘書長吳樹培繞過查逸超，直接制訂校董會議程，吳樹培甚至公開參與聯署反對立法會議員嘅私人草案。好難相信，一個副校長居然咁夠膽不把校董會主席放在眼裏？上樑正，下樑就不會歪，道理顯淺得很。

中大另一個引起社會譁然嘅事，就係2022年4月校董會通過續聘段崇智任中大校長，任期三年，箇中因由至今仍然係一個「謎」。喺段崇智續任中大校長呢件事上，好似冇咗「透明度」呢三隻字。

當日如果唔係《香港國安法》實施，中大今日仲然係惡名昭彰嘅「暴大」，日日汽油彈橫飛，那來平靜？正正因為中大係香港一間很好嘅大學，大家當然愛之深責之切，中大值得有一個更好嘅校長嚟領導。一個真正愛中大嘅人，無論薪水同權位有幾高，應該知所進退，不要尸位素餐。一間大學需要平靜嘅環境才能發展得好，中大也不例外。

（文章為作者的個人意見，並不代表《幫港出聲》立場。）

原圖︰https://image.stheadline.com/f/1500p0/0x0/100/none/b45c281aa93f2e469107be3ea64b5d0f/stheadline/inewsmedia/20210117/_2021011708502141317.jpg

 

投票已截止，多謝支持