警方國安處於7月3日宣佈，每人懸紅100萬港元，通緝8位竄逃海外、涉嫌違反《香港國安法》嘅人士。呢8位通緝犯分別為許智峯、郭榮鏗、羅冠聰、袁弓夷、任建峰、蒙兆達、郭鳳儀同劉祖迪，相信大家對佢哋都唔會陌生。

有句警世說話叫做「善惡到頭終有報」。呢班人身處香港時如何搞風搞雨，將香港推向動亂，相信唔使多講，大家心裏有數。到佢哋逃離香港之後，仍然不知收斂，視《香港國安法》如無物，繼續在海外涉嫌干犯危害香港同國家嘅勾當。

凡事有因有果，佢哋恃住有西方政棍嘅保護罩，大搞危害香港、分裂國家嘅「港獨」活動，如今被警方通緝完全係咎由自取。佢哋嘅餘生將切身體會到《香港國安法》嘅威力！特首早已明言相關通緝令終身有效，只要佢哋一日唔返香港埋單，佢哋每日都要活喺惶恐之中，時時刻刻都要擔心被人出賣。

話說回頭，上述8位被通緝嘅逃犯，至今已有4人在港嘅親人被帶走問話。7月11日羅冠聰父母及兄長，在東涌寓所被國安處人員帶署助查。7月18日蒙兆達兄嫂及侄兒亦被帶走助查。7月20日輪到郭榮鏗嘅父母兄嫂被帶走助查。7月24日袁弓夷大女袁彌望、兒子袁彌昌及其妻、去年已發聲明與袁弓夷脫離「爺媳關係」嘅立法會議員容海恩，亦被帶往警署協助調查。

明眼人都看到，西方媒體和網上黃媒喺呢件事上故意模糊焦點，上綱上線，講乜嘢「禍延家人」，以達至轉移視線嘅目的，所以有需要講多幾句，以還原事件嘅本質。

呢宗案件嘅本質係國安法案，牽涉嘅係涉嫌違反《香港國安法》嘅嚴重罪行。眾所周知，通緝令除咗係長期有效，仲會邀請逃犯嘅親友和身邊嘅人協助調查，以掌握逃犯去向，增加將逃犯繩之以法嘅機會，呢個亦都喺全球各地警方嘅慣常做法，警方國安處今次嘅做法不過係依法辦事罷了，有乜嘢值得大驚小怪？所有為此呱呱叫嘅人，佢哋背後嘅目的反而更啓人疑竇。

除此之外，事件嘅另一本質就係彰顯法治。香港喺2020年7月已實施《香港國安法》。從國安法生效嗰一刻開始，所有人都應該守法。但呢8個人喺《香港國安法》生效之後嘅所作所為，明顯有違法之嫌，所以警方向法庭申請拘捕令，通緝8位國安逃犯，可以話係合法合理。

警方帶走國安通緝犯家人助查，除咗打聽呢8位通緝犯嘅下落之外，估計亦想調查有冇人在港以金錢資助被通緝者喺海外繼續從事危害國家安全嘅勾當。7月初國安處人員搗破由前「香港眾志」成員設立嘅「懲罰Mee」網購平台，調查佢哋涉嫌利用平台所得資助竄逃嘅羅冠聰，就畀大家睇到斬斷逃犯嘅資金鏈供應，係如何有效打擊國安通緝犯嘅氣焰。

最後呢8位國安通緝犯，無論佢哋講到點樣天花亂墜，後台有幾「硬」都好，佢哋喺境外從事「港獨」活動，涉嫌干犯《香港國安法》下嘅煽動分裂國家罪、顛覆國家政權罪、煽動顛覆國家政權罪、勾結外國或者境外勢力危害國家安全罪，嚴重危害國家安全。既然佢哋搞得「港獨」，就應該預咗有今日，可憐佢哋家人慘被連累，真係「生累港人，走累親朋」！

（文章為作者的個人意見，並不代表《幫港出聲》立場。）

原圖︰https://www.wenweipo.com/a/202307/21/AP64b9d9dde4b043f3863e1506.html

投票已截止，多謝支持