如果要用一句話嚟形容黑暴嗰屆區議會，相信用「見過鬼怕黑」呢句話夠晒貼切。當時大批反中亂港分子恃住混亂局面，騎劫區議會仲佔據好多議席，將原本服務市民嘅地區平台，變成反中亂港嘅基地，搞風搞雨，無日無之。

「香港不能亂，也亂不起！」特首李家超喺4月25日出席行政會議之前，講嘅呢句說話相信絕大部份正常守法嘅香港人都心有同感。李家超仲話，地方行政檢討已進入尾聲，將會好快公佈細節。

過去區議會嘅變質，係香港政治動亂嘅一環。回歸後特區嘅政治動亂唔係天災，而係人禍！有一班甘為西方效犬馬之勞嘅政棍，恃住有外國勢力喺背後撐腰搞搞震。對於呢班存心搞對抗搞破壞嘅政棍，絕不能息事寧人，必須堅決鬥爭同撥亂反正，撲熄任何企圖破壞嘅火苗，否則香港人都好難有餐安樂茶飯。

李家超為即將完成檢討嘅區議會一錘定音，劃下「5個不容許」嘅紅線，包括不會容許區議會成為「港獨」平台；不會容許區議員違反《基本法》；不會容許區議員干擾政府施政；不能容許區議會被騎劫、被癱瘓；不能容許這些害群之馬再破壞社會。

面對嗰啲潛伏喺度等待時機搞亂香港嘅反中亂港分子，李家超斬釘截鐵講出「5個不容許」，等於直接話畀佢哋聽：你哋可以死咗條心啦！

這是好事！回歸後中央和特區政府對反對派仁慈，但佢哋人心不足蛇吞象，無止境地破壞對抗，甚至夠膽搞「港獨」，2019年嘅黑暴動亂大家有眼見。大亂之後嘅大治，撥亂反正當然要明刀明槍，原則問題更不容含糊。這不是「硬」，這只是見過鬼之後嘅正常防衛。

為防止區議會再出現被人騎劫嘅亂象，李家超更提出「三大原則」。一是國家安全要放在首位，二是全面落實「愛國者治港」原則，三是充分體現行政主導。國安才能港安，港安才能家安，這是正常人都明白嘅道理，無需多講。「愛國者治港」亦係天經地義，唔通仲會畀啲支持暴力嘅區議員，個個月領取津貼咩？至於行政主導，本來就係《基本法》對香港政治體制設計嘅一項重要原則，只係過往畀反中亂港分子騎劫嘅區議會搞到烏煙瘴氣，今次檢討只不過係一次撥亂反正罷了。

另外，對於將來區議會嘅議席數目同組成方式，李家超表明來屆區議會議席數目與現屆嘅差不多，區議員嘅酬金同津貼亦考慮維持不變，但議員產生嘅辦法必須符合《基本法》賦予嘅定位同職能，並保留一定嘅選舉成份。其實區議員係唔係由選舉產生並唔係最重要，最重要嘅係區議員可唔可以喺地區層面嘅事務上幫到市民。

由於區議會過去被反中亂港分子搞亂咗太長時間，搞到大家都忘記區議會其實只係一個地區組織，佢嘅本職喺民生和社區事務，唔係搞政治，所以只要區議員幫到市民解決本區問題同促進鄰里和諧，區議員最終係唔係由選舉產生，其實唔係市民最關注。

所以，一言以蔽之，即將完成嘅地方行政檢討，只要能夠喺國家安全、「愛國者治港」等大原則上確立方向，落實執行，市民喺地區民生事務上就可以得益，反中亂港分子亦休想再作惡！如是者，反對派政棍騎劫區議會做馬騮戲兼浪費公帑，就可以正式成為歷史了。

（文章為作者的個人意見，並不代表《幫港出聲》立場。）

原圖︰http://www.takungpao.com.hk/news/232109/2020/1201/526773.html

 

 

投票已截止，多謝支持