有朋友日前在通訊群組傳來一則新聞，內容係兩個本港民主派現任區議員，早前經網上申請台灣入境簽證被拒，之後被要求去駐港嘅台北經濟文化辦事處作「雲端申請」，但過了一個月仍未獲批，兩人因此向傳媒吐苦水，表示「深感無奈」。

眾所周知，香港嘅民主派同台獨民進黨理念相近，都具有親美、反中反共嘅立場。2019年香港黑暴期間，本港民主派甚至向港獨靠攏，對當時囂張至極嘅港獨分子，不但不譴責不割蓆，反而選擇沉默，變相等於縱容支持，客觀上成為了台灣地區領導人蔡英文當年連任勝出的「最佳助選員」。

香港民主派和攬炒分子對台獨民進黨繼續奪取執政權，曾立下如此汗馬功勞，照理說，蔡英文應該感激再感激，投桃報李，奉為上賓。但時至今日，香港呢班民主派政客究竟得到乜嘢豐厚嘅回報呢？結果原來令人啼笑皆非，令人有一種騙案結局嘅感覺。咁錯漏百出嘅呃人伎倆，原來泛民真係有人會落疊。

對於呢兩個連申請入台旅遊簽證，都被拒絕放行嘅民主派區議員，台灣陸委會只係淡淡然、例行公事哋回應：「今日香港情勢與三年前不同，需要就個案進行審查，只有合規才可獲准到台…..」。這還不特止，台方仲要再加一句：「相關程序是要確保台港人員正常往來，以維護公共秩序與安全」。言下之意，畫公仔畫出腸，咪就係話驚你班民主派走去台灣地區搞搞震，危害台灣嘅安全同秩序囉。

面對蔡英文呢種「打完齋唔要和尚」嘅過橋抽板，群組中有人精警地幾句話就點明了要害——「成班傻仔成為咗棄卒，依家兩頭唔到岸」、「鳥盡弓藏，走狗烹，狡兔死」、「活該，抵有今日」等等。

2019年至今，民進黨同蔡英文對香港民主派嘅態度，可謂天淵之別。由口口聲聲「無限支持」、「稱兄道弟」，到今日以諸多藉口推搪唔畀入境，變臉之快，唔知泛民同攬炒派有冇一種畀人一盤冷水兜頭淋嘅感覺呢？這何止係世態炎涼，乜嘢叫做現實政治，當年嗰班係威係勢嘅黑暴份子，而家終於可以真正見識到了！

其中一個被拒發台證嘅民主派區議員，話自己係因為做區議員需要宣誓擁護基本法和效忠特區，所以被拒赴台。但現實係乜嘢呢？作為非建制派立法會議員嘅狄志遠，論議席地位同知名度都遠高過呢兩個區議員，而且狄志遠要做香港特區立法會議員，同樣都要宣誓，但佢去年11月已成功赴台觀察當地九合一選舉，申領台證一點也沒有問題，所以呢兩個區議員嘅「因宣誓被拒入台論」，如果唔係捉錯用神或自大症發作，就顯然係自我安慰，跌落地都要拿返渣沙。

今時今日佢哋向傳媒披露事件，但就連自己姓甚名誰都唔敢公諸於世，究竟係自覺理虧，抑或面目無光，抑或啞子食黃蓮，有幾苦佢哋自己先至知。2019年飲完， 2023年或今後一段好長嘅時間，佢哋仍然要繼續埋單。食得鹹魚就要抵得渴！其實當年已經好多人苦口婆心勸過佢哋，凡事唔好去得太盡，唔好被台獨利用，結果瘋狂上腦不聽勸告，如今自食其果，佢哋可以怪得邊個？要怪只能怪自己！

所以今次呢兩個民主派區議員申請台證不獲批，佢哋唔應該「深感無奈」，而應該深感後悔和深感清醒才對！都係嗰句：美國同台獨如果信得過，咁豬乸都一定識上樹！至於鳥盡弓藏，就更加係恆古不變嘅硬道理！希望2019年曾經迷失嘅人，尤其係香港嘅後生仔，能夠從今次事件中睇到真相，唔好再俾人利用。

（文章為作者的個人意見，並不代表《幫港出聲》立場。）

原圖：蔡英文 Tsai Ing-wen FB圖片

👇 記得Follow 我哋 👇
IG: instagram.com/silentmajority.hk/
FB: fb.com/silentmajorityhk
Weibo: https://weibo.com/u/6655322587
Youtube : https://www.youtube.com/silentmajorityhk

 

 

投票已截止，多謝支持