受新冠疫情困擾3年，香港已經好耐冇舉行過重要嘅體育盛事。去年11月初喺大球場舉行嘅2022香港國際七人欖球賽，算係後疫情時期嘅一個好開始。

雖然運動能夠帶來正能量，體育比賽亦應該超越政治國界，但幾個月前一連串嘅體育賽事賽事播錯國歌鬧劇，既是令人憤慨又失望，好端端的國際競技，因而蒙上污點。

欖球賽雖然刺激，但在香港似乎欣賞呢項比賽嘅多數都係外國人，不及足球、籃球等本地觀眾嘅普及。香港嘅足球同埋籃球有自己定期的聯賽，亦有相對完善嘅甲乙組賽事。

2月23日，喺荃灣體育館舉行嘅FIBA男子籃球世界盃亞大區預選賽，中國男子籃球隊首次以香港做主場，同哈薩克男子籃球隊對壘，並以71︰59勝出。嚟緊2月26日中國隊又會再在同一場地對決伊朗，希望國家男籃可以繼續旗開得勝。

支持國家隊反映血濃於水

今次國家男子籃球隊來港比賽，除咗帶來精湛嘅球技同刺激嘅比賽，亦為香港帶嚟咗正能量，俾人有煥然一新、香港回復正常嘅感覺。

首先係門票售賣非常踴躍，聽講門票一推出唔使5分鐘就已經全部售罄，比一啲熱門歌星嘅演唱會更加難撲飛。大家嘅踴躍除咗係因為「餓波」太耐，亦因為大家都想現場支持中國隊，為中國男籃加油。

早前男籃國家隊抵港，機場就已經湧現歡迎嘅球迷，其中唔少仲係手持國旗嘅學生。到咗大戰哈薩克籃球隊嘅時刻，現場觀眾更加一面倒力撐國家隊，現場球迷「中國加油」嘅打氣聲此起彼落。比賽中，每當司儀高呼「中國」，觀眾就會自己接上「加油」兩個字。

呢種喺香港撐國家隊比賽嘅時刻光景，已經好耐冇喺香港出現，今次重現，特別令人既感慨又感動。除咗係疫情因素之外，疫情前香港刮起嘅一股盲目反中仇中，甚至公然認賊作父披上美國國旗大搖大擺嘅歪風邪氣籠罩香港，令人心噏和羞愧。堂堂中國人噓中國國歌，成何體統？

喺《香港國安法》同埋《國旗法》、《國歌法》實施之前，呢股歪風邪氣甚至惡到，每逢球賽奏唱《義勇軍進行曲》時就搗亂背向國旗 ，發出噓聲，風氣之壞令人既氣憤又蒙羞。歪風邪氣係一種傳染病，不喝止不斷然制止，歪風只會越演越烈。例如去年11月，法庭判處一個網媒記者喺觀塘一個商場侮辱國歌罪名成立，判處3個月監禁，就係好好嘅撥亂反正，以儆效尤。

今次入場觀眾嘅踴躍，對男籃國家隊嘅全情支持，才是同一個國家內，大家同胞血濃於水應有嘅正常反應。這種情感係自然而然嘅事，因為中國大家都有份，自己國家隊嘅榮耀自己與有榮焉。呢種自然嘅情感支持，全世界每個國家嘅國民都係一樣。愛國並唔係乜嘢抽象或形而上學嘅嘢，而係好自然嘅事，不容扭曲或醜化。

隨着香港疫情消減正在逐漸邁向復常，我哋希望有更多嘅體育國家隊來港訪問或比賽，為香港帶來更多精彩刺激嘅高水準賽事，同時帶來更多嘅正能量！

原圖︰星島日報

https://std.stheadline.com/realtime/article/1907556/即時-體育-籃球-新帥佐積域旗開得勝-國家隊71-59輕取哈薩克

投票已截止，多謝支持