對於接連在多場國際體育賽事中，出現播國歌竟變成獨歌的鬧劇，原因之一是牽涉網上搜尋結果問題。特區政府因此多番要求Google將正確的中國國歌置頂卻遭拒絕，相信對於包括香港人在內的任何一個中國人來說，都會感到十分氣憤。國歌是一個國家的尊嚴，亦關乎一個國家人民的民族感情，豈容Google砌詞狡辯，蒙混過關？

Google敢當特區政府冇到，堅持唔改，堅持將錯誤嘅港獨歌曲置頂，Google所恃嘅「豹子膽」，不外乎來自於三方面，一係自恃係美國企業，背後有美霸撐腰；二係以「資訊流通」做幌子，以「言論自由」做遮醜布；三係恃住自己係互聯網搜尋嘅「巨無霸」，一句就係唔改，睇你特區政府又奈得我何？

Google嘅呢種氣燄同詭辯，同美式霸道一樣咁可惡，咁乞人憎！

Google是不為非不能

首先喺Google對保安局去信要求更正嘅回應係廢話——乜嘢叫做「Google系統不會人為操控有機的搜尋結果」？全世界都知道只要有人願意付款畀Google，Google就會將有關嘅付款內容喺搜尋排名往前推，甚至可以置頂。既然技術上完全可行，置頂與否亦只係做唔做嘅問題，Google嗰啲「不會人為操控搜尋排名」嘅回應，除咗係廢話外，更加係狡辯！

其次，如果今次出事嘅係美國國歌，Google又會唔會以同一個「理由」去敷衍美國政府、美國國會同美國人呢？點解歐盟法院裁定Google必須將一啲唔準確嘅搜尋結果刪除，Google一句異議都冇，就自動自覺遵從歐盟要求，反之對特區政府要求糾正錯誤就推三推四，拒不執行？咁明顯嘅雙重標準，同美國政客一樣咁厚面皮，唔通香港人真係好蝦啲？

再者，明知而家置頂嘅中國國歌係錯誤資訊，Google都仍然堅持唔修改，好明顯呢個問題已經唔係互聯網問題，更加牽涉政治。而且呢種做法，客觀上係助長假資訊流通，實際上亦成為咗港獨嘅幫兇，所以又係一個道德問題。

有問題就係有問題，咁係唔係因為Google夠「美霸」又夠大，香港人同香港特區政府就對佢冇晒符呢？就要繼續容忍佢為所欲為呢？我諗正常嘅香港人都唔會接受！其實喺呢個問題上，香港仍然有幾張王牌可以用。

敷衍港人 不可容忍

首先道理在香港呢一邊。任何一個國家同地區嘅正確國旗國歌，都係一件非常重要同埋嚴肅嘅事情，不容許有半點馬虎、歪曲同埋錯誤出現。特區政府應該繼續向Google施壓，不能不了了之。我哋而家係正確維權及維護尊嚴，絕對可以理直氣壯，因為就算換轉喺其他國家或地區，佢哋都會同樣咁做。

第二，喺執法嘅層面，如果Google繼續拒不糾正，繼續將錯誤嘅港獨歌曲置頂，國安處係唔係可以睇吓有邊啲《香港國安法》條款可以對Google執法？就算動不了Google美國總部，Google香港分公司嘅高層人員會唔會因此負上刑責，國安處都應該開始研究一下。

除《香港國安法》之外，並他香港法例，例如國歌法國旗法，係咪有條例可以應對Google呢種明知故犯和拒不改正，律政司、保安局和立法會議員應該進行檢視。如果現行條例無法應付，係咪應該進行修例堵塞漏洞，相信亦係一個可取之道。

此外，最近有立法會議員提出引用《立法會（權力及特權）條例》，傳召Google負責人親身到立法會接受議員提問，亦不失為一個好辦法。除咗特區政府外，立法會都應該代表民意，喺姿態同埋實際上擺出強硬一面。傳召Google高層親身到立法會，公開畀大家睇吓Google係咪真係有死都抝翻生嘅本事？係咪真係見錢眼開？應該幾有睇頭！

總括嚟講， Google以一啲似是而非、雙重標準嘅「理由」拒絕糾正和敷衍香港人，已經係擺到明事實，我哋仲要畀Google繼續有恃無恐落去咩？

原圖︰網頁截圖

 

投票已截止，多謝支持