已解散嘅「賢學思政」前召集人王逸戰、前秘書長陳枳森、前發言人朱慧盈和黃沅琳，早前承認一項「串謀煽動他人實施顛覆國家政權」罪，9月24日於區域法院進行求情。案件原定於10月中判刑，後來延至10月22日法庭才公布裁決。
呢4個嘅被告，兩男兩女，其實都好年輕，全部19至21歲。換句話說，佢哋犯案嘅時候都只係17至19歲。區域法院法官郭偉健日前判刑，將案件定性為《國安法》之中「情節較輕，但接近嚴重一端」。按照呢個定性，即係違法者可以被判處五年以下有期徒刑。而呢四名被告，最終有三人被判入獄30至36個月，另一人則被判入教導所。
今次法官作出呢個判決，可以話係已經相當仁慈。因為根據《國安法》，任何人煽動他人實施顛覆國家政權，如果法官斷定情節嚴重嘅，就需要判處5年以上10年以下嘅有期徒刑。
呢宗案件為大家帶嚟咗幾個新啟示，值得大家討論，更值得十幾廿幾歲嘅年青人作為警醒嘅殷鑒。
首先係，破壞國家安全、違反《國安法》嘅犯罪行為，有關的法律界線紅線非常清晰，犯法後要承擔的法律後果亦相當嚴重。而且不論年紀大小，一旦觸犯，就要做好準備接受嚴厲嘅法律制裁。
過去一兩年大家可以睇到，2019年黑暴期間觸犯暴動罪而罪成嘅人，刑期一般為3、40個月。而呢4個「賢學思政」嘅成員，即使只係喺街上擺街站，但宣傳分裂國家和顛覆國家政權，就算認罪獲扣減三分之一刑期，佢哋仍然需要入獄30至36個月，刑罰同暴動罪差不多。所以，嗰啲想以身試《國安法》嘅人，尤其係年輕人，最好自己先諗清楚。《國安法》真係唔係「冇牙老虎」！
其次，犯法之後再來後悔已經太遲！雖然有關嘅宣傳片同海報，大家由細睇到大，但仍然不斷有人重蹈覆轍。就好似今次呢單案，兩個案發時才18、19歲嘅女學生，做咗違法嘅事才感到後悔，才知道讀書重要，可惜大錯已經鑄成。
請求判監 何必當初
其中「賢學思政」前發言人朱慧盈，現正修讀浸會大學遙距學士課程，而且成績不錯。佢認為判監可令佢自己在獄中有多啲時間讀書，即使判監會令自己留有案底，但仍然請求法官判佢坐監，而非入教導所接受職業訓練但不會留有案底。法官在考慮後如佢所願，判佢即時入獄30個月。類似呢種「早知今日，何必當初」嘅令人惋惜故事，又真係何必呢？
除此之外，從「賢學思政」呢宗違反國安法嘅案件，大家亦可以睇到年青人誤交損友、一時衝動嘅代價可以有幾大。今次「賢學思政」案嘅主犯叫王逸戰，佢之前亦係一個學生。2020年初，當黑暴已經逐漸退潮冇咁瘋狂之時，王逸戰在2020年5月成立了「賢學思政」，而且在《國安法》實施之後仍然毫不收斂，繼續公然上街叫囂勇武抗爭和港獨口號。
當一啲長期反中亂港嘅組織和人物，在《國安法》實施之後都已識得「走位」收斂，但王逸戰帶領下嘅「賢學思政」卻仍然上街鼓吹顛覆國家政權。從呢種毫無智慧嘅行為，你就會知道乜嘢叫做「得鋪牛力、不學無術」。
再者，王逸戰被捕前表現得「係威係勢」又點？案件才一開審，佢已經急不及待認罪，到審訊後期更透過律師向法庭求情請求輕判。如果案中兩名女被告，早知道創立「賢學思政」嘅王逸戰係呢種「求情嘅貨色」，佢哋當初仲會唔會一開始就俾人呃去搞港獨革命惹官非呢？
年輕人誤交損友，後果可以好嚴重，甚至後悔一生。好似王逸戰呢種愛出風頭嘅港獨革命小頭目，無論佢哋嗰把口講得有幾天花亂墜，骨子裏其實都係金玉其外，敗絮其中，大難臨頭各自飛。
從王逸戰改「賢學思政」呢個組織名，呢種自己誇自己係「賢學」嘅人，完全缺乏中國人嘅內斂謙虛，有嘅只係俾人睇到佢想學黃之鋒搞個「學民思潮」博出位。咁樣嘩眾取寵嘅貨色，都可以呃到有人陪佢一齊不知天高地厚搞顛覆，所以話年青人真係要帶眼識人，凡事要停一停、諗一諗，切勿太衝動。
由「係威係勢」、「寧死不屈」，到瞬間全部認罪求情，好似做緊戲咁，「賢學思政」呢個教訓十分突出。希望香港嘅年青人都能夠引以為鑑，冇人會再成為炮灰，亦冇人會再後悔。
原圖：星島日報
記得Follow 我哋
IG: instagram.com/silentmajority.hk/
Weibo: weibo.com/u/6655322587
Youtube : youtube.com/silentmajorityhk
投票已截止，多謝支持