炮灰係乜嘢意思？相信唔使多講，大家都知道。在戰爭之中，火炮發射後產生的炮灰，成為戰場多餘的東西，沒有人想要，還必須派人清理。這就是戰場上炮灰的現實意義，也是炮灰的宿命。

上周在區域法院審結的「9.29政總暴動案」，11名被控暴動罪的年輕男女被告，全部被判罪名成立，法庭將於9月9日判刑。看到這個裁決結果，令人聯想到炮灰。顏色革命嘅棋子，失敗咗當然就淪為炮灰。

高調政棍 今日「隱形」

2019年極力煽動年輕人上街的那些政棍，如今不少走咗去英國，或變成咗銷聲匿跡嘅「隱形人」，就像水過無痕，當乜嘢都冇發生過一樣。大家係咪好耐都冇見過陳日君、梁家傑、余若薇這些人出場呢？昔日嘅高調，今日嘅沉默，繪畫咗一幅醜陋嘅明哲保身，古今中外其實都一樣。

可憐的是一班當日相信「革命號召」，上街掟汽油彈或參與暴動嘅年輕人，如今上庭埋單，才驚覺結果是要面對官司，而代價是自己的前途。從結果論，在這場失敗的顏色革命，佢哋成為咗另類炮灰，被人用完即棄，當無異議。

這11個不認罪但全部罪成嘅「9.29暴動案」被告，年齡介乎16至26歲。這麼年輕就成為被人利用嘅炮灰，你話有幾可惜。但講到底最傷心的，相信莫過於佢哋嘅父母和家人。

在這11個罪成被告中，7人是學生，三年官司折騰期間，呢幾個學生仲可以專心讀書嗎？退一步講，即使可以，罪成一刻等住佢哋面對嘅，恐怕會是監獄大門和牢獄生涯，人生或將從此被改寫。一念天堂，一念地獄，要做咗炮灰才明白這種道理，人生往往就是這樣弔詭。

留有案底 前路坎坷

曾經講過「留案底令人生更精彩」嘅公民黨楊岳橋，如今也因「35+非法初選案」正在監獄還柙。楊岳橋坐監係咪真係「咁精彩」，只有佢自己才心知肚明。但有一點可以肯定嘅係，呢11個暴動罪成等候判刑嘅被告，就算依家感到後悔，但一切已經太遲了。不但當日啲「手足」全部唔見晒，就連美軍也不敢登陸香港拯救佢哋。

進一步而言，這些被告假若留了案底，今後想做政府工或者專業人士，基本都唔使諗了。就算想離開香港，連俗稱「良民證」嘅無犯罪記錄證明書都申請唔到，除非英美肯畀政治庇護，否則移民之路已封死了。

正因為淪為炮灰有咁悲慘嘅後果，所以呢個世界正常有腦，識得諗嘅人，都冇人想做炮灰。香港的黑暴炮灰，好似這11個被告，佢哋之所以有今日的結局，只能夠講係入世未深畀人呃。雖然滿腔熱誠，但被人利用，犯了法始終都是要埋單，不能夠因為無知做咗炮灰，就可以免除刑責。

嚟緊這些黑暴炮灰埋單嘅法庭新聞，肯定會陸續有來。佢哋對香港有破壞無建設，但唯一嘅貢獻就係可以作為警世故事，警惕其他人不要再被騙淪為炮灰！尤其是年輕人，有了這些前車之鑒，更要切忌「容易衝動唔諗後果」嘅通病，否則他日行差踏錯，就會後悔莫及。

另外，睇過呢啲炮灰埋單嘅新聞，卻仍然迷戀喺香港搞對抗、甘心做外國勢力代理人，或無時無刻仍然想把「革命當飯食」嘅人，只能夠講佢哋實在「中毒太深」，淪為炮灰之日必不遠矣。

 

原圖︰星島日報、now新聞截圖

https://std.stheadline.com/daily/article/2482703/日報-港聞-9-29政總暴動案-11男女罪成下月判刑

投票已截止，多謝支持