黑暴飲完埋單，判囚陸續有來！近日再有一宗黑暴案件審結，被告係一名現年21歲，案發時18歲嘅女大專生郭凱盈，涉嫌於2019年聲援理大被困暴徒，喺油麻地一帶參與暴動，被告日前被裁定「管有攻擊性武器或適合作非法用途的工具」及「管有物品意圖摧毁財產罪」罪名成立，被判入獄18個月。
每次看到這類黑暴判囚的新聞，睇到一個又一個涉及黑暴案的青年、甚至只係十幾歲嘅少年學生，被判入獄或入懲教所、教導所嘅法庭判決，總係令人想起黎智英、戴耀廷……仲有棄保潛逃著咗草嘅許智峯等人，點解呢啲入獄嘅學生青年，冇一個係呢班政棍嘅仔女？精人出口，笨人出手，真係千古定律。被洗腦誤導嘅人，就算而家清醒後悔，也已經太遲了。
辯方求情時指，年輕嘅女被告係受當時不良嘅社會氣氛影響才不智犯罪。每當聽到這些「求情理由」，大家係咪都有一種似曾相識嘅感覺？坦白講，呢啲「求情理由」，大家都已經聽到厭，聽到麻木。記憶所及，差唔多每宗黑暴案被告被定罪之後，唔係用「年輕」、「初犯」，就係用「已感到後悔」、「受社會氣氛影響」作求情。如此千篇一律，令人懷疑佢哋係唔係由細到大，都冇學過「早知今日，何必當初」呢八個字？如果真係後悔，點解唔係一開始就認罪？反而成日等到罪名成立之後才來「後悔」？
好似呢個女被告，審訊前原本已準備認罪，但一開庭又改口不認罪，結果仍然逃不過入獄兼留案底嘅結局，這反映佢心存僥倖。雖然律師幫佢打甩咗暴動同在非法集結中使用蒙面物品兩罪，但「管有攻擊性武器」及「管有物品意圖摧毁財產」罪成，亦足夠送佢入獄，一嚐18個月嘅鐵窗滋味。根據香港法庭慣例，被告若審前認罪可獲三分之一刑期減免。但呢個女被告自以為聰明，反口覆舌唔認罪，想博唔使坐監全身而退，結果都係難逃法網。
據案情披露，被告於2019年11月18日凌晨4時40分，在彌敦道與窩打老道交界附近被捕。當時佢佩戴防毒面罩、頭盔、護目鏡及手套，一副標準嘅黑暴裝束。正常人都會諗，「好人好姐」點會凌晨4點幾出現喺暴亂現場？而且仲要帶齊防毒面罩、頭盔，一身黑暴打扮？更難以解釋嘅係，點解喺佢個背囊裏面還被搜出多用途鉗及打火機燃料？呢個世界有好多事，畫公仔唔使畫出腸，水落總會石出，今次法官亦明察秋毫。
女被告牽涉嘅呢宗案件，源於當日有人發起解救理大被圍困黑暴嘅所謂「圍魏救趙」行動。講起圍魏救趙，大家都知道這是一個中國戰國時代嘅歷史典故。眾所周知，2019年黑暴出現盲目反中反共，甚至追打喺街上講普通話嘅人。但一場咁反中仇中嘅政治暴亂，偏偏又要採用源自中國歷史嘅圍魏救趙典故作行動代號，你話係咪一種精神錯亂或思覺失調？
喺2019年這場奪權失敗嘅顏色革命動亂中，類似嘅黑暴自作聰明同亂作口號嘅事件，實在不勝枚舉，將來肯定會貽笑萬世。像這個女大專生一陣認罪，一陣唔認罪，反口覆舌，妄想逃避法律制裁，但當日佢嘅所作所為、一身打扮，早已注定佢落得聰明反被聰明誤嘅結局。天理循環，呢18個月嘅監禁係佢咎由自取。
https://image.stheadline.com/f/1500p0/0x0/100/st/e0500ed7b97314ab6b03a36fbbad0197/stheadline/inewsmedia/20190801/_2019080121570456258.jpg
投票已截止，多謝支持