自去年起，在黑暴案審訊過程中，興起了一個新名詞叫做「旁聽師」。乍聽「旁聽師」這三個字，相信好多人都有一種「冇乜好嘢」嘅感覺，令人聯想到洗腦黃師、黑暴期間所謂嘅「記者」、「救護員」等掛羊頭賣狗肉嘅黑暴同路人。冇錯，如今出現在法庭的這些所謂「旁聽師」，其實就係呢種黃色歪風嘅延續。
這些「旁聽師」的惡行包括兩部份。一是企圖擾亂法庭秩序，將法庭變成黑暴政見的宣示場所；二是涉嫌辱罵滋擾黑暴案外聘檢控官，甚至對佢哋進行起底攻擊，令外聘大狀因安全考量不敢再接辦同類檢控工作。佢哋只揀取黑暴案法庭才去旁聽，而且在庭上動作多多，目的根本唔係聽審，而係為咗搞破壞。
這些「旁聽師」嘅所作所為，延續黑暴黃絲一貫幼稚無聊嘅作風。例如故意穿著印有黃傘圖案的服飾、戴上印有政治訴求的黃色口罩、在法庭上喧嘩、對檢控官無禮辱罵、同法官爭辯、甚至尾隨檢控官入廁所進行滋擾等等。這些無賴嘅行為，除咗破壞法庭嘅正常審訊，實際上亦係挑戰法治，只不過唔再係街道發生，而係轉移到法庭之上。
司法機構和律政司如果任由呢啲無賴嘅「旁聽師」，繼續橫行無忌，法庭嘅尊嚴和秩序又如何能守得住？終審法院首席法官張舉能，日前喺法律年度典禮後，回應有關問題時說：「阻礙法官聽取證據、控辯雙方論據或作出判決，均屬阻礙法庭工作。」——呢啲「阿媽係女人」嘅說話，大家都知道，其實唔使多講。
最重要嘅係法庭會點樣回應？張舉能說：「法官有權停止一些滋擾性行為，甚至要求他們離開法庭，更嚴重的可能構成藐視法庭」⋯⋯聽咗張官嘅回應，令人有啲摸不着頭腦嘅感覺。存心搞事嘅「旁聽師」而家已經直入法庭「踩場」，但司法機構仲係度講緊乜嘢「要求他們離開法庭」，有冇搞錯？口講「可能構成藐視法庭」，但沒有實際執法行動，對這些「旁聽師」有乜阻嚇力？
據悉，律政司刑事檢控專員日前透過下屬，向參與黑暴案的外聘大狀發電郵，提到「旁聽師」對檢控人員嘅言語攻擊和欺凌深表關注，要求檢控人員如果遇到同類事件，應立即通知律政司，以便採取適當行動。所謂「適當行動」究竟係乜，冇人知道，試問「旁聽師」又點會收斂？
從2019年顏色革命嘅慘烈教訓，大家應該認清一個事實——對黑暴民粹惡行，退一步係唔會海闊天空，只會令佢哋變本加厲，肆無忌憚。「旁聽師」其實就係黑暴嘅「軟對抗」。街頭暴動失敗，佢哋就走入法庭圍爐取暖，開闢另一個戰場繼續惹是生非。對呢種黃色刁民，單靠法官將佢哋趕出法庭，根本不能解決問題。你可以想像一下，如果喺侏羅紀年代，餵食肉嘅暴龍食齋，會有乜嘢後果？容忍「旁聽師」嘅惡行，結果只會被反噬。
對於「旁聽師」干擾法院審訊和滋擾司法人員，司法機構和律政司不應只是流於口頭警告，只有報警處理才是正路！沒有警方執法，藐視法庭罪對於「旁聽師」來說只是隔靴搔癢，佢哋只會變本加厲。「旁聽師」連法官和檢控官都不放在眼裏，法庭人員又怎能發揮作用？審理黑暴案的法庭，其實應該主動邀請警方派員多作巡視，或安排便衣探員出庭監視，對不知收斂的「旁聽師」更應執法和提出檢控，這才是遏止「旁聽師」歪風的最有效方法！對付「旁聽師」講乜都假，警方執法才是最實際！
原圖：http://img.takungpao.com/2020/0423/20200423042348600.jpg;
https://www.judiciary.hk/en/publications/annu_rept_2020r/images/banner203i.jpg