最新一項全球民眾對政府的信任度民調顯示，在新冠疫情下，中國民眾對政府的信任度全球最高！呢項調查是去年11月進行，共訪問了全球28個國家超過36,000人，主要就民眾對本國政府、媒體、企業及非政府組織的信任度進行調查，由一間總部設於美國的公關公司所做。 
 
結果出爐之後，中國成績亮麗，中國政府獲民眾嘅支持度全球第一，將美國遠遠拋離！呢個結果，對於經常對中國指手劃腳，成日搵「理由」批評中國嘅美國嚟講，猶如當頭棒喝，非常冇面。 
 
首先係數字說明一切！係呢項調查中，中國嘅信任度綜合指數高達83%，中國人民對政府嘅信任度更高達91%，為10年來最高水平。反觀美國如何？美國人對美國政府嘅信任度簡直慘不忍睹，只有39%，即係連中國嘅一半都冇！ 
 
滑稽嘅係，只有39%民意信任嘅美國政府，卻喜歡成日扮「民主人權教師爺」，對擁有91%民意認同嘅中國政府指手劃腳。用一句廣東俗語嚟講，美國嘅政客真係唔知個醜字點寫。 
 
要評價一個國家嘅政府做得好唔好，最有發言權嘅係呢個國家自己嘅人民，而唔係外人、外國政府。正如莊子所言：「子非魚安知魚之樂？ 」中國政府做得好唔好，應該由14億中國人自己來評價，幾時輪到華盛頓嘅政客越俎代庖？更何況，由僅得「39%」民意信任嘅美國，去批評獲得「91%」民意信任嘅中國，這本身就係一個笑話。 
 
當然，美國有啲本身帶住有色眼鏡睇中國嘅人，又會想當然咁話「中國人在極權統治下，當然不敢說真話」——背後嘅潛台詞就係想抹黑，受訪嘅中國民眾都係「被逼支持政府」。其實今次民調完全係由一間美國公司所做，如果咁樣都仲有人想攻擊民調結果嘅可信性，咁咪即係指控美國機構做假？盲目反共反華，係一種冷戰思想；唔相信中國人民，係一種自以為是嘅白人至上主義⋯⋯睇嚟美國步入衰落係有佢自己嘅原因。 
 
政府做得好唔好，一場新冠疫情，就係一面最好嘅照妖鏡。最新嘅數字，3億幾人口嘅美國，確診新冠肺炎嘅人數已高達6700萬人，死亡人數更突破85萬人。但14億人口嘅中國，迄今確診人數約10.5萬人，死亡人數更少於5000人。 
 
所以講多無謂，中國政府喺保障人民最基本嘅生命安全上，早已勝過「世界警察」嘅美國無數咁多倍。一個政府連自己國民嘅生命健康都照顧唔好，仲有乜資格聲大夾惡指責別人？點解中國人聽到以美國為首嘅西方國家，指責中國政府係新疆進行所謂「種族滅絕」時，會覺得只係得啖笑？因為謊言始終係謊言，係中國生活嘅人清楚知道事實係點樣一回事。 
 
事實上美國政府治理國家嘅能力，相對於中國政府亦係乏善足陳。去年底，由美國民調公司蓋洛普發表嘅「全球安全指數」，中國排名全球第2名，而美國只排22名，落後中國足足20名。一個人覺得喺美國生活安全，定係中國生活安全？呢個調查嘅結果，就係最好嘅答案。美國早已喪失胡亂指責中國嘅底氣和道德光環，但美國政客仍然沒有自知之明，或者明明知道卻選擇繼續掩耳盜鈴。 
 
上周睇到兩則有關美國嘅新聞，任何人睇咗之後，相信都只會搖頭。一則係去年最後一季，洛杉磯平均每日有近100個貨櫃被洗劫，連貨運列車亦成為匪徒嘅目標，唔值錢嘅包裹和貨物遭撕爛散落路軌周圍。呢啲好似係荷里活電影中，只有落後嘅第三國家才會發生嘅事，原來而家每日都係美國上映緊。另一則係一名華裔女子，日前喺紐約地鐵月台被人無故推落路軌，結果被當場駛至嘅列車撞死。美國竟然會發生呢啲事，對中國人嚟講根本難以想像。 
 
見微知著，美國嘅國家管理和民主體制早已今非昔比，再盲目崇拜所謂嘅美國標準，純屬自欺欺人，結果只會搭沉船。14億中國人早已看清呢一點，拒絕顏色革命，可憐嘅只係香港嘅黃絲，上錯咗賊船，信錯咗日落帝國。中國民眾對中國政府嘅信任度全球最高，而呢個民調結果係由美國機構得出，請問美國仲有咩資格對中國指手劃腳？

原圖：https://www.wenweipo.com/a/202112/21/AP61c126f5e4b07b4059d995bb.html