立法會換屆選舉將於下月19日舉行，特區政府擬計劃在羅湖、落馬洲以及蓮塘/香園圍三個邊境口岸設立邊境投票站，以方便身處內地港人可以免檢疫投票。
眾所周知，民主選舉投票率越高越好。越多人投票，當選人越有認受性，也越能體現民主。更何況今次選舉，是香港告別黑暴動亂，全面落實「愛國者治港」原則後的首場立法會選舉，重要性不言而喻。
正常愛香港的人都知曉，下個月嘅選舉，越多的市民出來投票，越能夠彰顯香港撥亂反正。只有死心不息的黃絲黑暴和港獨逃犯，才會千方百計唱衰立會選舉，甚至煽動投白票或杯葛投票，以圖拉低投票率。
因應疫情檢疫隔離的原因，特區政府打算在邊境口岸設置投票站是現實和適當的變通做法。世界上有很多國家選舉時都有安排境外投票，香港的邊境投票也不是什麼新鮮事。
對於一件這樣簡單不過的票站安排，公務員工會聯合會主席和總幹事，卻前後腳走出來，以似是而非的「理由」指指點點，挑挑剔剔，不禁令人想問：究竟佢哋意欲何為？
根據媒體引述，公務員工會聯合會主席唐麗娥在邊境票站消息一出，就馬上跑出來批評相關安排倉卒及緊迫，「香港都已安排得咁混亂，跨區工作得很厲害，住樂富的要去赤柱票站工作，說是早上六點半要到，邊境是禁區，有些更是沒有交通的。」
聽見一個公務員工會的頭頭講呢啲，作為一個升斗市民其實覺得十分刺耳。全香港打工仔每日要跨區工作的又何止百萬？但你幾時有聽過呢啲勤勞嘅打工仔抱怨過一句？更何況做票站工作人員只是一日「咁大把」嘅工作，有乜咁大問題？呢位唐主席嘅「咆哮」，係咪想向全港市民曬命——香港公務員有幾養尊處優？而且仲要揀嘢來做？使唔使特區政府安排每位公務員都喺佢哋自己屋企樓下票站開工，才叫做「合理」？
除咗主席，呢個公務員工會仲有一個知名度較高嘅總幹事叫梁籌庭，佢係民主黨創黨成員，已經從公務員隊伍退休10年。梁籌庭其後再喺電台發炮，講嘢更加誇張，竟形容邊境票站是「沙漠」，又認為政府「安排倉猝」，獲指派的公務員必然來自其他區，擔心佢哋冇得投票云云。
其實，深圳早就已經高樓大廈處處，今時今日仲有人用「沙漠」來形容深圳與香港為鄰的口岸，實在匪夷所思，令人懷疑呢啲人究竟係唔係香港生活？抑或係坐喺美國想像中國？至於作為工作人員嘅公務員點樣投票，咁簡單嘅問題，香港又唔係第一次選舉，當局又點會安排唔到？如此小問題都可以講到好似「天就快跌落嚟」嘅人，呢啲人究竟居心何在呢？
如果以上呢啲似是而非，無的放矢，對口岸票站嘅「問題」係出自黃絲或黑暴分子之口，大家或許還能理解。但這些無謂的質疑，竟出自公務員工會領導人之口，卻不禁要令人大打問號，究竟佢哋真正嘅目的係乜嘢？
呢排社會出現一個新嘅名詞，叫做「軟對抗」，形容不甘心顏色革命失敗嘅黃絲、黑暴同埋港獨分子，仍然在不斷尋找機會對抗中央和搗亂特區管治。「軟對抗」唔似黑暴明刀明槍掟汽油彈，而係搵機會對政府政策措施進行唱衰、陽奉陰違、採取不合作、柴台搞對抗。
特區公務員雖然已經宣誓，但公務員隊伍仍然存在隱形黃絲搞「軟對抗」。例如有公務員使用假「安心出行」程式、個別公務員嘲諷英勇殉職的女警「抵死」等等，呢個問題值得令人警惕。個別公務員工會今次對設置邊境投票站，表現出超乎常理嘅「擔憂」，甚至諸多挑剔，不禁令人懷疑公務員隊伍中是否仍有「黃絲代言人」？
原圖：https://hd.stheadline.com/news/realtime/hk/1937392/%E5%8D%B3%E6%99%82-%E6%B8%AF%E8%81%9E-%E5%B0%88%E6%AC%84-%E5%85%AC%E5%83%95%E4%BB%8A%E5%B9%B4%E5%9C%A8%E5%AE%B6%E5%B7%A5%E4%BD%9C%E5%A4%9A%E9%81%94%E5%9B%9B%E5%80%8B%E6%9C%88;
https://std.stheadline.com/realtime/article/1778870/%E5%8D%B3%E6%99%82-%E6%B8%AF%E8%81%9E-%E7%AB%8B%E6%9C%83%E9%81%B8%E8%88%89-%E6%9E%97%E9%84%AD%E6%8C%87%E5%B7%B2%E9%97%9C%E9%96%89%E9%82%8A%E5%A2%83%E7%AE%A1%E5%88%B6%E7%AB%99%E5%B0%87%E8%A8%AD%E7%A5%A8%E7%AB%99-%E5%86%80%E6%9C%AC%E5%91%A8%E5%85%AC%E5%B8%83%E8%A9%B3%E6%83%85