講到黃色經濟圈，真係冇人唔識渣哥同龍門冰室這兩間餐廳。最近大渣哥宣佈灣仔分店即將結業。諗起呢間餐廳喺當年嘅黑暴期間，進入餐廳所有人士都要出示身份證以證明是港人身份，講到明唔做內地人生意。
試問黑暴期間有邊個內地人願意落嚟香港，去你間餐廳度食飯？食都食到背脊骨落。講起大渣哥呢間餐廳係蔡強榮（渣哥）同佢老婆譚小環開嘅，成日被質疑喺網上鼓吹年輕人「抗爭」。不斷喺度出口術賺盡黃人嘅錢，到而家有《國安法》之後，佢又夠唔夠膽再喺門口查人身份證呢？其實大渣哥出口術氹黃人課金，就大家都心中有數，不過勢估唔到手足支持佢哋都係得把口講。而家《國安法》成立咗咁耐，佢係咪都心知肚明冇得再打正旗號，所以索性嚟一個「急流勇退」？嚟一個瀟灑走一回？
口講撐黃 做過啲乜？
真係有睇過渣哥喺網上嘅公告嘅人都會掩住口笑佢自己都唔知自己講緊乜？渣哥話每日都做到意興闌珊，既然做得咁辛苦就不如索性執左佢。又扮晒偉大叫啲黃人支持下其他黃色小店，其他嘅小店比佢更加辛苦好多。黑暴嗰時咁多餐廳，店舖畀暴徒搞到無生意做，最終執笠收場，又唔見渣哥叫人去支持呢啲小店？
講到縮骨、算爆，老土嚟形容黃色經濟圈嘅老闆真係一隻字都冇錯，非常貼切。先有龍門冰室嘅老闆話聘請「手足」做打工，點知就有人爆料話佢哋對「手足」勁刻薄，有稱幫過佢打工嘅「手足」都大吐苦水。龍門冰室仲大搞籌款，話要支持年輕人，結果就因款項爆出爭議。
再講返渣哥，佢真係以為黃人手足會一直支持佢，仲將盤生意發大嚟搞，渣哥仲話做生意唔係蝕就係賺，講真句渣哥最終蝕定賺就無人知。筆者只知道之前賺咗咁耐，而家就咁講兩句，就嚟一個既光榮又偉大嘅引退。原因為何，相信大家自有想法！
第三個當然要數到Chickeeduck老闆周小龍，喺店內放一個暴徒雕像，將個招牌改成鬼畫符嘅「光復香港」就立即成為黃人打卡熱點，低成本高效益咁增加營業額。生意人就係生意人，但呢三位老闆用咁嘅手法去賺錢就，筆者真係不敢恭維。其實諗返轉頭呢三位咁熱血嘅黃老闆口講就支持，實質上又為過黃人做過啲乜嘢？求其叫幾句口號？喺衣服上印吓香港？印吓加油？其實都只不過一場政治爛騷，搵吓生意啫。
原圖︰渣哥 一九九六Facebook圖片、星島日報
https://www.facebook.com/JarGor1996/photos/pcb.4427020470709293/4426940997383907
https://std.stheadline.com/realtime/article/1770274/即時-港聞-維港會-大渣哥茶記-港島店結業-營業至下周二