《港區國安法》橫空出世，黑暴政變徹底失敗之後，移民成為了熱門話題。在黃媒大肆渲染下，「移民潮」好像一觸即發，好像講到香港天就快塌下來一樣。
留意我博客文章的讀者都知道，對於因害怕《國安法》而要移民離開香港的人，筆者一直都不覺得有任何值得可惜，更認為用「好行夾唔送」這句話歡送他們最為貼切。講到底，對國家起了異心的人，不要也罷。
同樣，那些不想做中國人的人，還留在中國人的香港特區幹嗎？要走就早走，早點去移民投靠五眼聯盟國家就是了，為何仍婆婆媽媽，像個怨婦日日阿吱阿咗？
最近幾個月，一眾黃媒寫的「離港浪漫故事」，拍的喊苦喊忽移民片，多如牛毛，但看得多，除了令人覺得煩厭，更多的是令人作嘔。
「為了小朋友移民」？上個月有個評論員已毫不客氣直斥其非，說每次自己聽到這個「移民理由」都想嘔！我相信他道出了很多香港人的同樣心聲。
「為下一代要移民」，說來好聽，但其實係擺細路仔上枱，大人自己的心理需要多於一切。因政治理由帶仔女移民的人，年紀大多在三、四十幾歲。人到中年，他們的父母含辛茹苦的養大了他們，本想老來享享清福，結果他們一句「香港冇自由」，拍拍籮柚就移民走人，咁就當「盡孝」，有冇諗過自己父母的感受？咁樣嘅身教，無論移民去到邊度，都係教壞細路。
有一份黃媒報紙，連續拍了多條移民片，主題大多集中在「為了下一代」。其中一條片，內容講兩公婆帶着兩個孖女移民去新西蘭，片中為人父者多次哽咽落淚話自己「唔走唔得」、「係走難唔係移民」......
點解「唔走唔得」？莫非做咗虧心事？抑或好似走佬的許智峯那樣有案在身，為逃避刑責，所以「唔走唔得」？俗語話平生不作虧心事，夜半敲門也不驚。這些人怕得要死，非走不可，究竟心中有什麼「鬼」？只有佢哋自己知。
講到「係走難唔係移民」，更顯出「港孩」成年化有多麼的幼稚。片中的家庭離港前大搖大擺開Farewell派對，在香港機場可以自由自在地依依不捨講Goodbye，然後舒舒服服坐飛機，食飛機餐直飛新西蘭......如果咁嘅排場都叫做「走難」，咁對於那些因殺戮戰亂，家破人亡，被迫倉皇逃離敘利亞或利比亞而投奔怒海，甚至葬身地中海的真正難民來說，簡直是一種極大侮辱！
又有另一條片，講的是一家五口準備四月移民去英國。移民理由同樣是令人毛管戙的「擔心孩子將來冇自由」，而且片中父母還實牙實齒講到「即使因此失去中國國籍也不會後悔」。係就最好啦，做人要牙齒當金使，唔好到時去到英國唔掂，又要返香港食回頭草，當香港係水泡攞着數。
其實這些帶着年幼子女貿然去移民嘅人，究竟他們的「擔心」是否真實存在呢？我認為「擔心香港將來冇自由」是一種自己嚇自己的心魔，多於實際威脅。
擔心香港有國安法？難道英國就沒有國安法？不要忘記，美國國安法之嚴苛，早已是世界聞名的。「擔心仔女將來冇自由」？請問全世界有哪個國家可以容忍香港黑暴那種違法破壞的自由？2011年倫敦暴動很多暴徒都被重判入獄，2021年1月特朗普支持者闖入國會山莊，很多都已被捕，並受盡舉國譴責。
所以我認為以香港人應享有的自由，放在全世界的標準下，為人父母以追求「更絕對的自由」，而貿貿然帶小孩子去移民，某程度上並不是一種負責任的做法，只是一種鬥氣、賭大細的冒險行為。
加拿大曾經是香港人移民熱點。但九七年回歸後，為何有大量移居加拿大的港人回流香港？還有大量當年他們從香港帶過去的，或在當地出生的子女，長大了還不是也回來香港搵食？如果移民後個個都係天上人間，又點會咁多人選擇返香港吃回頭草？
所以今日因政治原因帶仔女移民嘅人，自己的政治「擔心」是一回事，香港的現實情況又是另外一回事。他們只是重覆九七移民歷史的事，將來的結果也只是歷史重演。
黃媒最近拍的移民片，已經拍得太濫，令人反胃。這些短片刻意塑造的「悲情」，浪漫化移民，結果又不知會害苦了多少個家庭？舉家移民是一個嚴肅的人生課題，影響很多人的生命軌跡，怎能被煽情的美化移民短片牽着鼻子走？
黃媒不斷製造「感人的」移民片，連小朋友也擺出鏡，販賣「悲情」，但講來講去三幅被，令人作嘔。以為報道「多咗人移民」就可以「翹起香港」，這是典型的黃色幼稚病。所以黃媒實在可以早啲收工，唔好再拍咁多劇情令人打冷震的移民片虐待香港人了！
原圖：RTHK截圖;
https://www.rthk.hk/tv/dtt31/programme/thinkaboutthinking/episode/689868;
https://www.youtube.com/watch?v=5AvteNbvzjQ&ab_channel=RTHK%E9%A6%99%E6%B8%AF%E9%9B%BB%E5%8F%B0