黃之鋒同周庭聽日就判刑，判決結果未知，但筆者深信，坐唔坐監唔係問題，問題只係坐幾耐。
老老實實，喺漢奸呢一行，佢哋兩個都算做得出色，尤其黃之鋒，大大話話十幾歲就上《時代雜誌》封面，唔理你鍾唔鍾意都好，都算係世界名人。所以今日晏晝筆者咁啱去廁所唔記得帶電話之際，不期然地諗咗諗，黃某同周某如果要坐監嘅話，坐完幾年出嚟，可以撈咩呢？
政棍就唔使諗，幾年後嘅政治環境，好明顯冇反對派嘅空間，唔係佢哋畀人淘汰，係佢哋嗰行畀人淘汰，你見班食開咁多年政治水嘅老狐狸，都借機搵個落台階退出，大家知咩事啦？
就當選舉主任一個唔覺意錯手畀佢哋入到閘，再當咁啱全香港啲黃絲未畀人呃夠，真係畀佢兩條友選到，但當議會再無所謂嘅「抗爭」，布冇得拉，時間無得嘥，咁就真係要做嘢喇喎！呢班連一份工都未必正正經經做過，成份CV嘅工作經驗就係做漢奸，姓黃嗰位仲要連摺被都要坐過監先學識，基本嘢都未必識啦！做議員唔係識吵識鬧就得，唔信可以參考吓同樣冇咩基本常識嘅黃絲區議員陳梓維嘅「表現」，大家就可以知如果黃之鋒同周庭當選立法會，會喺咩光景。
本土政治無得玩，佢兩個改打國際戰線有冇得諗？都係無得諗。國與國之間，唯一嘅立場就係利益，隨著侵侵fade out，中國愈來愈強大只會係事實，唔畀面中國嘅後果實在太大，畀錢養兩個搞亂中國嘅人，倒不如變個臉賺大錢。正正經經搵份工又好冇？仲難！有邊個老細會想請一個郁啲就示威，同你攬炒反枱嘅員工？
最後筆者諗到嘅，就只剩下黃色經濟圈呢條路，睇下佢哋紛紛開patreon叫人課金睇文睇相，拍下youtube呃like賺錢，可能遲下仲可能搞個眾籌，集眾人之力養活自己，諗下都幾爽！所以佢哋嘅眼中，抗爭喺唔可以完，完咗仲邊有飯開呢？萬一佢哋真係要坐監，坐完更加可以將被害者嘅角色演得更神似同合理，然後再同fans講，我要抗爭，所以你要課金，呢個就係新式政棍生存之道了。
到最後嘅最後，一切一切，可能都只係筆者諗多咗，話唔定佢哋一早收夠錢，出返嚟咩都唔使做，可以直接退休呢？其實諗嚟都多餘，邏輯顛三倒四嘅黃絲世界，又點會係正常人可以明白…算啦，諗得嚟都夠鐘喇，筆者都係著返條褲，返出去收工了。
原圖：https://hd.stheadline.com/news/realtime/hk/1807705/即時-港聞-黃之鋒-羅冠聰及周庭等4人-宣布退出香港眾志