話說四年前，狂人侵侵當選美國總統，令全世界大跌眼鏡，當侵侵上台之後，更加當成個國家係佢自己公司一樣，想點就點。由亂打貿易戰開始，到呢一年來「特」色防疫，將美國由半殘搞到全殘，選咗呢個都唔知話佢癲好定傻好嘅總統，相信一直以來覺得「美國最偉大」嘅美國人，有好多都諗過移民，如果侵侵做多四年，應該唔係諗，而係即刻執包袱走。但搞笑的是，侵侵敗選好多美國人好開心，但視美國人為手足嘅黃色香港人就好唔開心喎！無他，「救世主」被打落神壇而已。

回顧呢次侵侵落難過程，筆者覺得，性格決定命運呢句說話，實在太有道理；大選過程中，侵侵先話自己贏硬，到輸緊成條街，都仲話自己其實贏緊，只係有人「造假」；自己差唔多輸硬，唔想面對結果，佢就要求停止點票，硬話自己一定贏，輸只係因為對方出術云云。有專家話佢性格有缺陷，接受唔到失敗，睇嚟好中。

扭總統位扭到十足十三歲細路扭玩具咁，口水鼻涕出齊，極盡樣衰能事，單單「醜出國際」四個字都不足以形容，因為選舉結果當然重要，對選舉過程，同樣可以看出一個國家嘅素養，所以呢次美國大選，由侵侵決定爭取延任嗰一刻開始，「美國大選」就已經變成「美國大損」嘅局面；侵侵輸咗撤賴肉酸畫面，肯定會畀人講多幾十年。退一萬步講，如果證實選舉中確有造假，推翻選舉結果，咁就仲衰！證明「民主大國」前面兩隻字只係講笑，建國以來嘅咩「美國夢」，原來只係一場夢遊。巧合的是，一向以來，好多事物前面加上「美式」兩個字，就一定會變成第二樣嘢；「美式」足球、「美式」咖啡、「美式」笑話，「美式」民主等等，所以「大選」變「大損」，一啲都唔出奇。如此百年大國，面臨雙輸局面，氣數盡乎否？雖不中，不遠矣。

原圖：http://www.xinhuanet.com/english/2020-06/06/c_139119246.htm

http://en.people.cn/n3/2016/0720/c90777-9088750.html