12位黑暴逃犯早前企圖偷渡台灣失敗，結果喺果洲群島附近被內地海警拘捕，至今仍被扣柙喺深圳鹽田看守所。黃政棍朱凱廸同涂謹申仲搵嚟一班聲稱係被捕者家屬開記招，個個蒙面戴帽身份不明喺到哭訴，講到12逃犯有幾咁慘、有幾可憐，企圖迫特區政府盡快將被捕者引渡回港。
呢邊攬炒派大鑼大鼓搞場大龍鳳，話要救12逃犯；嗰邊台灣記者鐘聖雄爆料，話有5位香港黑暴被台灣陸委會扣柙2個月，至今音訊全無。但黃政棍就裝聾作啞，扮睇唔到，連粒聲都唔敢出。難道呢5位黑暴就唔使幫？抑或係佢哋被台灣蔡英文政府扣柙，無晒政治油水，無晒利用價值，所以唔值得幫？
老老實實呢17位黑暴逃犯因畏罪潛逃被扣柙，根本唔抵可憐！係反修例黑暴嘅恐怖活動下，上水7旬清潔工羅伯被暴徒用磚頭掟死；馬鞍山李伯被暴徒縱火活生生燒成重傷，仲有大量被暴徒私刑嘅市民，被黑暴起底欺凌嘅警察及其家屬，大把人慘過呢班黑暴逃犯。
呢班逃犯涉嫌製造或管有爆炸品、縱火、串謀傷人、暴動、襲警、管有攻擊性武器及管有工具可作非法用途，以及涉嫌違反《香港國安法》有關勾結外國或境外勢力危害國家安全等罪，條條都係重罪，個個都係重犯，如今為逃避法律制裁棄保潛逃最終被扣柙，根本係自己攞嚟。
任何人都要為自己做過嘅行為負責，呢條黑暴絕路係佢哋自己揀，犯咗法就應該承擔番自己嘅法律責任。食得鹹魚抵得渴！既然選擇偷渡台灣，理應預咗被捕，咁仲有咩好喊？
原圖：https://static02-proxy.hket.com/res/v3/image/content/2750000/2751404/chu20200912_1024.jpg