因身負多宗刑事案並棄保潛逃，現正被香港通緝的前民主黨立法會議員許智峯，日前喺澳洲悉尼一間餐廳又鬧出被潑水斥罵「人渣」的新聞。

廣東話有啲俚語確實好啜核——桐油酲始終係裝桐油！喺香港未走佬前，行事嘩眾取寵，不擇手段，例如喺立法會蝦女人強搶女行政主任手機，匿入男廁偷窺嘅許智峯，做咗逃犯去到澳洲，卻仍然不改博出位嘅本色。去年底，許智峯亦曾隔洋害人，在網上貼文煽動在立法會選舉中投白票或不投票，結果令轉載貼文的人在香港被捕。

今次事件發生在當地時間8月7日下午，許智峯與友人在悉尼一間餐廳用膳時，遭一名男子潑水，並直斥許智峯係人渣，並恐嚇下一次會「打鑊你」。對於呢個遭遇，許智峯又點會放過可以見報嘅機會。

嘩眾取寵界的極品

8月9日，許智峯喺社交平台貼文，話自己作為政治人物，過去曾遇過類似情況，應對方式係「盡量不回應不糾纏，以免衝突升溫，自己亦唔會對事件介懷」。但姓許此君真係有咁「順攤」？答案當然係冇！息事寧人，從來都唔係許智峯嘅作風。

許智峯話自己「唔會對事件介懷」，隱喻自己「唔驚」，其實係夜行人吹口哨的道理一樣。如果真係「唔介懷」、「唔驚」，佢又使乜事後高調走去報警？而且仲要喺網上貼文向全世界公布，慌死冇人知？

習慣咗高調自大嘅人，又點會甘於寂寞？許智峯連報警都要玩「高級過人」，除咗話自己已向悉尼當地嘅新南威爾士州警方報案，仲同時向澳洲聯邦警察、澳洲安全情報組織、澳洲國家安全部舉報。

咁嘅報警陣勢，連澳洲情報組織，同澳洲國安部都要走去舉報，大家睇到呢度，係唔係已經睇通透咗乜嘢叫做自大同死性不改？呢個世界原來真係一樣米養百樣人，如果話許智峯係嘩眾取寵界嘅極品，相信都冇人會反對。

做緊通緝犯，許智峯卻以為自己做緊「總統」。佢何不直接要求澳洲政府出動澳洲國安G4，全天候廿四小時保護佢同佢全家呢？但你估澳洲納稅人又肯唔肯答應佢呢？做人要有自知之明，自大都要靠譜。但呢個香港通緝犯，顯然仲係唔知。

不知收斂遲早闖禍

曾經喺香港打橫嚟行、好大官威嘅許議員，早就已經成為了過去式，變成了「曾經」。過去是不可一世嘅尊貴議員，如今是戴罪之身，正式身份是逃犯和通緝犯，許智峯仲學人玩乜嘢高調囂張？

佢今次另一個報警理由係，「佢喺澳洲嘅人身安全牽涉到港人公眾利益。」聽見呢啲講法，只能慨嘆一句：自大原來真係無藥可救！

許智峯今次喺澳洲畀人潑水和指罵，從另一方面睇，亦說明了許智峯嘅漢奸同搞事形象深入民心。做漢奸乞人憎、犯眾憎，係幾千年來每個中國人都知道嘅事。點解秦檜和汪精衛至今仍然受盡天下人唾罵？咁係因為有啲事唔好做得太過火，事情做過了頭，結果往往就是物極必反。

就好似最近台獨分子「倚美謀獨」做過了頭，同佩洛西合演了一場大龍鳳之後，結果換來所謂海峽中線消失了，解放軍連續數日圍台演習，台灣得不償失，啞子吃黃蓮。有啲人同事，例如搞亂香港同叫囂港獨分裂中國，做得出就要承擔後果，唔好事後扮「無辜」。

以許智峯不甘寂寞嘅偏激性格，走到邊度，邊度就會有是非，闖出更大嘅禍，唔係「會唔會」嘅問題，而只係幾時問題。毛主席說「風物長宜放眼量」，廣東話有一句「放長雙眼」，書面語叫做「走着瞧」，唔信嘅話，大家睇吓幾時又有許智峯騎呢丟架嘅新聞。漢奸通緝犯不知收斂，闖禍出事只係遲早嘅事。

 

原圖︰星島日報

https://www.singtaousa.com/2022-06-02/訛稱外訪棄保潛逃裁定藐視法庭罪成-許智峯稱無愧/4105427

投票已截止，多謝支持