博客

博客

離港又回港 前區議員吃回頭草的啟示

施梓山 2022年06月29日 23:00

施梓山:「對於好似郭天立呢種離港又重新回港吃回頭草嘅人,大家其實冇需要執着佢哋自打嘴巴。願意回頭,已經係一種抉擇。希望呢啲人返香港之後可以腳踏實地,重新擺正自己嘅心態,明白香港係中國一個特區,尊重『一國兩制』和遵守法律,同港獨黑暴徹底割蓆,重新一齊建設香港。建業難,守業更難,香港有今日嘅成就,離不開國家嘅支持同七百萬人嘅共同努力。明白呢個道理,相信沒有人會捨得好似黑暴咁樣打爛香港。」



👇 記得Follow我哋 👇

IG: instagram.com/silentmajority.hk/

FB: fb.com/silentmajorityhk

Weibo: weibo.com/u/6655322587

Youtube : youtube.com/silentmajorityhk

離港移民係近年香港嘅熱門話題。不斷有報道話學校少咗幾多學生,醫護界流失咗幾多人手……講到香港就快冇運行,甚至好似「世界末日」咁。但真實情況又係咪咁樣呢?

喺呢啲移居外地,尤其係攞住BNO一家大細匆匆忙忙飛去英國嘅新聞背後,最近已陸續傳出有啲人因抵不住異國生活之苦而回流香港嘅消息。有人辭官歸故里,有人漏夜趕科場,本就係世道常態,所以我經常講,對於呢波移民潮,其實冇乜值得大驚小怪。尤其香港經歷過六四和九七回歸前後兩次移民潮後,香港人有乜風浪未見過?當年離開香港移民嘅人,到而家不是很多都已經回流了嗎?

眾所周知,今波移民潮走嘅人好多都係黑暴黃友,當然亦有部份係為咗追尋「美好生活」而人走佢又走。對於接受唔到香港已經回復法治和秩序,唔認同「一國兩制」嘅黃友,佢哋嘅離開,對香港同佢哋本人,其實都係一件好事,因為呢個世界從來都係勉強冇幸福。與其勉強佢哋留喺香港心生不忿搞破壞,倒不如畀佢哋早啲去英國享受「烏托邦」。

民主黨前九龍城區議員郭天立,自去年被DQ後隨即宣佈基於「個人原因」離港。經過咗差唔多一年,日前又喺社交媒體公佈,話自己「過去數月在不同國度遊歷,對不同的人和事有了新的體會」,又指自己離港後「情緒長期抑壓而無法紓壓,甚至喜怒無常」。最後強調自己並非「流亡或走佬」,離港只是「旅居海外」,期盼在隔離限制稍為放寬後,返香港回家與朋友相聚,並稱希望外界可以理解其決定。

一句講晒,郭天立呢則帖文嘅意思,就係佢將會返香港。對於呢位離港不久,又回港吃回頭草嘅黃絲議員嘅自白,究竟有乜啟示呢?我認為有以下幾項。

首先當然係早知今日,何必當初!當你嫌香港呢樣唔好,嗰樣唔好,嫌香港「冇民主、冇言論自由」乜乜乜一大堆,然後決定瀟灑離開香港,去西方國家尋找自己嘅「樂園」,結果唔使幾耐,親身試過、捱過之後,終於知道香港有幾好了。在家千般好,出門一日難,做二等公民從來都唔係一件好受嘅事。如果當初唔係搞顏色革命,暴力街頭,又點會搞到最終要兜兜轉轉離港又回港,應驗早知今日,何必當初呢句話呢?

第二個啟示係,原來有啲道理,你苦口婆心勸一個人係冇用嘅,要等被勸嘅人自己受過苦、撞過板,佢才會得到教訓,才能警醒。外國嘅月亮係咪真係比香港圓,去了看了試了,才能寒天飲雪水,冷暖自知。所以對於㷫烚烚、決心離港嘅人,大家其實可以慳返啖氣唔使勸,只能祝佢哋好運。

再者,呢個民主黨前區議員嘅自白,話自己離港後嘅情緒長期抑壓、喜怒無常,我相信呢種精神狀態並非佢獨有。移居外地,係一個人生重大抉擇同轉變,如果係舉家搬遷,更係牽一發而動全身,需要事先做好心理準備。但而家攞住本BNO就走去英國嘅人,試問當中有幾多人,真係做好呢方面嘅準備才出發?網上有啲帖文話自己一到咗英國,「呼吸自由嘅空氣」,感覺一切萬事大吉,就似活在天堂。對呢種講法,我唔知道有幾多人會相信,但我只知道補藥黨騙案,日日都有人被騙。

此外,對於好似郭天立呢種離港又重新回港吃回頭草嘅人,大家其實冇需要執着佢哋自打嘴巴。願意回頭,已經係一種抉擇。希望呢啲人返香港之後可以腳踏實地,重新擺正自己嘅心態,明白香港係中國一個特區,尊重「一國兩制」和遵守法律,同港獨黑暴徹底割蓆,重新一齊建設香港。建業難,守業更難,香港有今日嘅成就,離不開國家嘅支持同七百萬人嘅共同努力。明白呢個道理,相信沒有人會捨得好似黑暴咁樣打爛香港。

外國嘅月亮係咪真係比香港圓,睇吓之後有幾多吃回頭草嘅移民港人回流,大家就會知道。但可以肯定嘅係,未來回流返香港嘅人只會多不會少,因為香港永遠都係祖國嘅東方之珠,香港未來機遇肯定只會多,不會少!

原圖:https://hd.stheadline.com/news/realtime/hk/2165329/%E5%8D%B3%E6%99%82-%E6%B8%AF%E8%81%9E-%E6%B0%B8%E4%B9%85%E9%9B%A2%E6%B8%AF%E6%8F%90%E5%8F%96%E5%BC%B7%E7%A9%8D%E9%87%91%E9%80%BE65%E5%84%84-%E6%8C%89%E5%B9%B4%E5%A4%A7%E5%A2%9E27-%E7%A0%B4%E7%B4%80%E9%8C%84;

https://www.facebook.com/photo/?fbid=458063702996516&set=pb.100063786710407.-2207520000..

 

 

投票已截止,多謝支持

發表意見

排列方式: