香港中文大學校長段崇智早前獲校董會通過續任三年，消息一出，旋即引來社會極大迴響。不少人都批評中大校董會嘅決定過於草率，過程也不透明，更質疑曾被激進學生和黑暴分子暱稱為「段爸」嘅段崇智，在2019年黑暴期間讓中大淪為「暴大」，表現甚差，不適合繼續領導中大。
面對外界批評和質疑，新上任嘅中大校董會主席查逸超，卻在5月16日以中大校董會名義發聲明，批評「個別校外人士質疑校方在段崇智任期屆滿前18個月，便作出續任決定嘅言論並不合理。」這位查主席領導嘅中大校董會以一句「不合理」，來回應社會大眾對有關續聘決定嘅質疑，除了盡顯「死雞撐飯蓋」，還反映了什麼？
香港中文大學是由香港納稅人公帑資助嘅公營大學，中大出了問題變成「暴大」，校園變成汽油彈兵工廠，部份學生甚至公然宣揚港獨，校長管理有沒有出問題？難道香港市民關注和出句聲質疑都不可以嗎？市民只係批評幾句，中大校董會就馬上用一句「不合理」作為還擊，姿態高高在上，真係好大嘅官威！但這些中大校董會成員是否已經忘記咗自己嘅身份，以為自己係私人公司老闆/董事，可以我行我素，當民意和社會輿論無到？
唔好忘記，中大校董會主席係由政府委任，出任中大校董會好歹也算是一份公職。擔任公職嘅人，其權力地位來自其職務，所以佢哋面對公眾最好都係謙卑啲，唔好忘記自己嘅位置，更加唔好幻想將中大變成獨立王國，想點就點。市民若有不明之處，中大校董會大可耐心解釋，點解要挑釁公眾？續聘事件至今已經過大半個月，事情原本正在慢慢丟淡，但中大校董會突然拋出這份「不合理」嘅聲明，客觀效果是火上加油，畀人感覺係重新點燃了輿論戰火。這是一班中大校董想見到嘅結果嗎？大學係搞學術嘅斯文之地，玩政治口水戰對中大有何益處？那些拍板出今次聲明嘅中大校董，應該要好好閉門反思！
其次，中大校董會這份「不合理」嘅反擊聲明，亦顯示了一種死不認錯，「死雞撐飯蓋」嘅態度，令人十分失望。市民對段崇智續任嘅質疑真係咁「不合理」嗎？
從程序上講，上任校董會主席梁乃鵬既然任期屆滿，點解喺臨退任前嘅最後一次會議，仲要為影響中大未來發展甚鉅嘅校長人選作出一個倉猝嘅決定？點解這個問題不留給接任嘅新主席去處理？如果出咗問題，到時又可以搵邊個問責？
從事件本身，段崇智因對校園黑暴有縱容之嫌，加上發公開信無理質疑警方，至今仍堅拒道歉，本來已經是備受爭議嘅「惹火人物」，其續約問題本應加倍小心謹慎處理。但中大校董會大部份人卻連這種政治觸覺都沒有，硬要快刀斬亂麻通過續聘決定，給人一種鬼鬼祟祟嘅非常負面感覺，實在十分不智。如果這些一意孤行嘅校董唔係蔑視民意，那麼只有自大、自以為是可以作為解釋了。
至於中大校董會聲明提到嘅「今年三月在校內展開廣泛資訊，先後舉行八次持份者會議……均得到積極支持」，亦令人覺得十分可疑。眾所周知，今年三月份正值是第五波疫情爆發高峰期，中大校園和香港社會一樣，很多實體運作在該段時間都暫時停止。在這種情況下，請問中大校董會是如何「展開廣泛諮詢」呢？係唔係隨便開幾次網上會議就叫做「積極支持」呢？如果真係咁，會唔會兒戲咗啲？
還有趁著去年底立法會換屆選舉，立法會議員校董未能全程參與嘅空窗期，而急急忙忙推進續聘一事，究竟係唔係有人想繞過立法會民意代表嘅監督，造成一種既定事實呢？奇怪嘅事還有今次校董會聲明，點解連立法會議員校董事前也未獲通知，要佢哋自己睇報紙先知？莫非中大校董會有人隻手遮天？
俗話說「錯就要認，打就企定」，唔知尊貴嘅中大校董，幾時先會識？在香港人心目中，中大是一間很好嘅大學，多年來人才輩出。所以中大被一少撮激進暴力嘅學生騎劫變成「暴大」，係一件令人非常痛心嘅事。期望那些黑暴學生可以幡然醒悟，向受到他們傷害嘅人同香港社會講聲對不起，相信好多人都會認同喺短期內係一件難於登天嘅事。觀乎今次中大校董會嘅處理手法，實在令人非常擔心，擔心中大嘅管治文化是否出了問題？點解「暴大」嘅激進學生死不認錯，中大一些校董面對批評又係「死雞撐飯蓋」拒不認錯？政府係時候要認真關注中大校董會嘅組成了。
原圖：https://std.stheadline.com/realtime/article/1206671/%E5%8D%B3%E6%99%82-%E6%B8%AF%E8%81%9E-%E4%B8%AD%E5%A4%A7%E5%93%A1%E5%B7%A5%E5%9C%A8%E5%AE%B6%E5%B7%A5%E4%BD%9C%E5%BB%B6%E8%87%B33%E6%9C%881%E6%97%A5;
https://std.stheadline.com/politics/article/1477540/%E6%94%BF%E6%B2%BB-%E6%96%B0%E8%81%9E-%E9%BB%91%E8%A1%A3%E4%BA%BA%E6%B6%89%E5%90%91%E4%B8%AD%E5%A4%A7%E4%BF%9D%E5%AE%89%E6%BD%91%E7%B2%89%E6%9C%AB-%E6%AE%B5%E5%B4%87%E6%99%BA%E6%8B%8D%E7%89%87%E6%96%A5%E6%83%A1%E6%84%8F%E7%A0%B4%E5%A3%9E
投票已截止，多謝支持