自2019年黑暴顏色革命失敗後，唔少黃友無法面對革命失敗，出現各種心有不甘、精神萎靡不振嘅問題。其中最顯著嘅病症就係「不得不走」，「不得不離開」香港嘅被迫害妄想症。最新一例就係工黨前立法會議員張超雄舉家走佬去加拿大。

點解話張超雄離港移居加拿大，會跟「不得不走」妄想症扯上關係呢？因為正常來說，香港係自由社會，出入境十分自由。過去係咁，而家係咁，將來都係咁。喜歡香港，就留喺香港居住同搵食；唔喜歡香港或有其他原因，咪離開香港移居他鄉，或乾脆移民囉，呢啲係司空見慣嘅事，無咩大不了。但張超雄抵達多倫多後，卻煞有介事咁喺社交網站留言話：「現在雖然未能安定，但至少安全」。張超雄嘅「政治戰友」，早前赴英嘅香港民研副行政總裁鍾劍華就更誇張，形容張超雄係「逃出生天」。單憑張超雄嘅所謂「至少安全」和鍾劍華浮誇嘅「逃出生天」，足可證明呢班黃友嘅被迫害妄想症有幾嚴重同嚇人。

香港出入境十分自由，人人來去自如，如果冇喺香港犯法，買張機票就可以即刻離開香港，何來乜嘢安全顧慮？又使乜講到「逃出生天」咁誇張？「平生不作虧心事，夜半敲門也不驚」，已經「平安逃離」香港嘅鍾劍華同張超雄，唔知佢哋有冇聽過呢兩句中國人成日掛喺嘴邊嘅話呢？

張超雄到咗加拿大之後，仲講咗一句「自己的基本自由不再需要仰賴當權者的賜予」。佢呢句話被好多黃媒、黃友拎嚟大煲特煲，大肆宣揚，想藉此曲線證明香港人嘅基本自由「受到損害」。其實這是另一種圍爐取暖嘅被迫害妄想症。香港人嘅自由，例如言論自由、出入境自由、就業等自由，相對於世界其他好多地方同國家，都已經十分寬鬆自由。當然，有一樣嘢經常喺香港被忽略，就係現實上呢個世界並沒有絕對嘅個人自由，任何自由都有一啲必要嘅限制。最基本嘅就係個人行使自由嘅時候，絕不能破壞社會安全和國家安全，守法係自由嘅底線，亦係自由嘅護身符。

所以，2019年黑暴掟汽油彈嘅暴動、嗌港獨口號分裂國家，呢啲行為早已違反香港法律和憲制架構，根本唔係「自由」，當然更加唔會受到法律保障，反而只會受到法律制裁，因此如果張超雄追求嘅係呢種所謂嘅無限制違法暴力嘅自由，咁佢真係應該早啲離開香港，佢嘅早走早着，對香港嘅法治和社會安定，反而係一件好事，而且唔會教壞細路。

以上係典型黃友嘅邏輯謬誤和被迫害妄想症。離開香港咪離開香港囉，乾乾脆脆瀟瀟灑灑走人，做乜仲要講咁多廢話？講到底大家都知道，其實係因為佢哋走得心有不甘。佢哋心有不甘啲咩呢？第一當然係顏色革命奪權失敗，佢哋心有不甘。第二係《港區國安法》幫香港撥亂反正，佢哋冇得再無法無天搞破壞，冇癮之下唯有離開。

再者就係之前犯法，冇勇氣面對法律責任或怕坐監，或坐完監「條氣唔順」，於是又心有不甘要走。張超雄曾因2020年5月擾亂立法會內務委員會會議，被法庭裁定藐視罪罪成入獄3周，今年2月24日才刑滿出獄，所以大家估佢會唔會甘心？唔甘心係一種個人情緒，上綱上線將樣樣嘢拉扯到乜嘢「自由、民主、人權」，其實係一種言過其實嘅負面情緒發洩，多過係香港嘅真實情況。

以香港現況，出入境仍然一如往昔十分自由，並唔係黑暴黃友口中講嘅乜嘢「逃出生天」，所以張超雄所謂嘅「至少安全」，大家可以當作茶餘飯後嘅一則笑話，得啖笑就可以了。人各有志，唔想做中國人，覺得西方嘅月亮比較圓，覺得做英國人、加拿大人、美國人會「威啲」，呢啲純屬個人選擇，要離開香港就離開香港，悉隨尊便，無需要覺得自己有「幾偉大」或有「幾大犧牲」。

如果唔甘心離港嘅黑暴黃友，仲想挽回別人對佢哋最後一點嘅尊重，佢哋最好嘅做法，就係向政府交回香港特區護照，聲明放棄香港永久居民身份和投票權，否則成日喺度狂噴口水，講乜嘢「不得不走」，只會令人覺得係一種被迫害妄想症。最後拜託要走就走，冇人阻你哋發達，但唔該要走就唔好講咁多危言聳聽，或往自己面上貼金嘅廢話，萬一以後要回流香港嘅時候，咁就十分難看了。

原圖：https://std.stheadline.com/realtime/article/1047604/%E5%8D%B3%E6%99%82-%E6%B8%AF%E8%81%9E-%E9%80%83%E7%8A%AF%E6%A2%9D%E4%BE%8B-%E5%BC%B5%E8%B6%85%E9%9B%84%E6%92%A4%E5%9B%9E%E5%8F%B0%E7%81%A3%E6%AE%BA%E4%BA%BA%E6%A1%88%E5%96%AE%E6%AC%A1%E7%A7%BB%E4%BA%A4%E7%A7%81%E4%BA%BA%E8%8D%89%E6%A1%88-%E7%A8%B1%E6%83%B9%E7%A4%BE%E6%9C%83%E7%96%91%E6%85%AE

投票已截止，多謝支持