博客

博客

中大政政系想重回正軌 先清瘀血除毒瘤炒黃師

施梓山 2021年12月01日 23:00

施梓山:「中大政政系今日淪落到收生大減的困境,固然係自作自受嘅結果,但冤有頭債有主,系內黃師才是真正嘅罪魁禍首!政政系想回歸創系初心,重回正軌,炒黃師係一道必須先跨過的坎,否則收生不足被殺系,恐怕只是遲早的事。」

👇 記得Follow我哋 👇
IG: instagram.com/silentmajority.hk/
FB: fb.com/silentmajorityhk
Weibo: weibo.com/u/6655322587
Youtube : youtube.com/silentmajorityhk

前幾日有報紙訪問俗稱政政系的中文大學政治與行政學系系主任盧永鴻教授,他透露了幾個令人關注的信息:一是政政系今年收生人數和收生成績雙雙下跌。二是政政系打算將同屬社會科學院的「全球研究」和「數據科學與政策研究」課程併入政政系,改變現在過於偏重政治學的情況。三是重整後的政政系不會改名或削減人手。

睇咗呢則新聞,令人有兩個即時感覺。其一係早知今日,何必當初!其二係難為了「家嫂」的盧永鴻教授。盧教授係80年代政政系畢業生,過去長期在理工大學任教,為人正派謙和,沒有半點架子,更沒有半點激進。他2017年才回到母校執掌政政系呢個「燙手山芋」,但不久即發生了2019年的港獨黑暴動亂,令中大變成「暴大」。政政系是公認的「暴大」重災區,內有激進黑暴師生造反,外有社會公眾觀感變壞,今年更冇乜人報讀。盧教授在這種非常時期擔任這個系主任的艱難處境,就像粵語長片裡的可憐家嫂,大家可想而知。

中大政政系變成黑暴重災區,其實是行了十幾廿年歪路的必然結果。上樑不正下樑歪,應該是最大的原因。2014年佔中清場,政政系副教授周保松特登到現場成為其中一個被捕者,當年曾大出風頭。政政系關信基呢個名,大家有冇聽過?如果冇聽過,大家都一定聽過余若薇呢個名。冇錯,余若薇做公民黨黨魁時,關信基做公民黨主席!

好多嘢其實唔使畫公仔畫出腸。政政系一些教授喺大學招牌嘅保護下教政治學,但自己又瞓身出去玩政治,變相模糊咗學術同政治嘅界線,咁樣教學生究竟有冇角色利益衝突?有冇人藉課堂宣揚政治主張?這是個嚴肅問題,但在香港卻幾乎無人討論。大學教授出嘅糧係香港政府公帑,但卻走去參加違法嘅佔中,最後竟又不了了之,這簡直就係天下奇聞。所以政政系嘅沉淪係由上層開始,冰封三尺,非一日之寒。

中大政政系淪為黑暴堡壘,亦為過去十幾年嘅社會製造咗好多激進嘅學生,形成一個不斷向下沉淪嘅惡性輪迴。激進學生通常都有一個弊病,就係互相「鬥激」爭出位,結果就係一個比一個激,一個比一個更不理性。

英文有個字叫做「Goodwill」,意思係好的信譽。但中大政政系經過過去十多年嘅激進化同不務正業,如今仲有乜「Goodwill」可言?約40個學額,今年透過聯招入學嘅跌到只有25人,其中5人更係將政政系排在首六志願以外的第三組別選擇,即係根本冇乜人想讀這個學系,連收生DSE成績亦下跌4分,實在令人慘不忍睹!約40個位得25人讀,即係政政系嘅學位供過於求,連低分者都唔吼!

堂堂一個曾經風光無限的中大「王牌學系」,淪落到今日「賣剩蔗」冇人想讀,將政政系帶到如此絕路嘅系內黃教授、黃講師,對得住政政系嘅先輩前人、校友師生嗎?為所謂嘅一己政治理想或政治私利,將政政系搞到如此臭名遠播,令人聽見「政政系」三個字都怕怕,嗰啲成日出鏡出風頭嘅系內時事評論員、成日幫《蘋果》寫評論嘅教授、講師,全部都係罪魁禍首。佢哋如果還有一點羞恥之心,就應該自己辭職執包袱,唔好再害人害物連累成個學系。

現實啲來講,「中大政政系」這個招牌已經被激進嘅黃絲黑暴師生「做臭」了,就算與其他課程合併,但繼續保留政政系這個名稱,係咪仲可以收到足夠學生?學生家長又想唔想自己嘅仔女讀得咁辛苦升到大學,結果入讀一個令人感覺同暴徒有關係嘅學系?呢啲都係好現實嘅問題。所以,雖然盧永鴻教授想盡力保留政政系這個已經有幾十年歷史的招牌,但現實亦要通盤考慮。至於盧教授說將來合併不牽涉削減人手,這亦然之過早。清除瘀血毒瘤,炒掉佔中黑暴的幕後黃師,才能長遠幫助政政系鳳凰重生,所以現階段不應排除任何可能性。

中大政政系今日淪落到收生大減的困境,固然係自作自受嘅結果,但冤有頭債有主,系內黃師才是真正嘅罪魁禍首!政政系想回歸創系初心,重回正軌,炒黃師係一道必須先跨過的坎,否則收生不足被殺系,恐怕只是遲早的事。

原圖:https://hd.stheadline.com/news/realtime/hk/2042643/%E5%8D%B3%E6%99%82-%E6%B8%AF%E8%81%9E-Juicy%E5%8F%AE-%E4%B8%AD%E5%A4%A7%E4%BB%94%E5%91%BB%E7%95%A2%E6%A5%AD%E8%AD%89%E6%9B%B8-%E7%89%9B%E9%BE%9C%E5%92%81%E5%A4%A7-%E6%98%93%E8%A2%AB%E5%90%8C%E4%BA%8B%E7%99%BC%E7%8F%BE%E6%90%B5%E7%B7%8A%E6%96%B0%E5%B7%A5;
https://www.wenweipo.com/s/202011/19/AP5fb5eef5e4b020344463fa57.html;
https://www.hkcd.com/content/2018-07/02/content_1094432.html

投票已截止,多謝支持

發表意見

排列方式: