區議會是一個為市民服務的法定區域組織,處理的都是地區民生事務。相信大家都會同意,區議會開會是一件嚴肅莊重的事,並唔係去沙灘玩泥沙,亦唔係去酒吧消遣。
都話而家攬炒派佔多數、話晒事嘅區議會越來越烏煙瘴氣、不務正業。深水埗日前發生的區議會飲紅酒醜聞,正正就係畀大家見識乜嘢叫做低處未見低。
何啟明道歉欠真誠
任你點樣想像,你都好難想像到一個正式的區議會會議,竟會變成有議員大模廝樣飲紅酒的Party,而主持會議的民協楊彧,竟又可以若無其事的話「毋須警告」。攬炒派區議員這種赤裸裸的護短和黑白不分,相信正常嘅市民都會睇到眼火爆。
區議員開會期間飲紅酒,已經超乎任何一個正常人的理解力和容忍度。用「不知所謂」或「一班垃圾」來形容這種事,也不足以反映市民的憤怒!現時區議員每月薪酬有成3.4萬元,市民出糧畀你開會,你卻乾杯飲紅酒,白逗人工,對得住當區的居民嗎?將開區議會會議當成係去蒲蘭桂坊或去夜場買醉,然後議員薪酬袋袋平安,講唔講得通呀?
全世界在哪裏可以看到議員在會議期間,會敢公然飲酒做劉伶?就算被攬炒派奉為「典範」的英國、美國,有發生過這種醜聞嗎?唔該攬炒派唔好將香港變成世界笑話,出醜出到全世界。
好一個民協何啟明,帶酒返區議會開會暢飲,最初受到批評時,還好意思講乜嘢「為同事餞行」、「飲少少酒冇影響議事質素」......這種廢話都講得出口,根本就是侮辱港人智商。如果今日為咗所謂「惜別」可以開會飲酒,明日你何啟明失戀或民協執笠,深水埗區議會又使唔使無限期停止開會?
當然,眼見社會嘅質疑和批評越來越強烈,何啟明又轉口風發出所謂「道歉聲明」,對自己嘅開會飲酒行為解釋一番。但呢種前倨後恭,看風使𢃇嘅「道歉」,其實只是怯於公眾怒火扮「認錯」,並沒有多少真誠反思,市民點收貨?
而且,唔好唔記得,同何啟明同場開會飲酒嘅仲有幾個攬炒派議員,佢哋至今仍然潛水龜縮,當冇事發生,一句交代都冇,擺到明當市民無到。呢種攬炒嘅極品,將來再有選舉,你仲會唔會投票畀佢呢?
主席處理差應譴責
何啟明及幾個佢嘅同類,之所以敢狂妄囂張,公然在會議期間飲酒,離不開深水埗區議會佔多數的攬炒派區議員的集體包庇,還有深水埗區議會主席楊彧的放縱。在深水埗區議會25個議席中,民協、民主黨、公民黨等攬炒派就佔了23席(周琬雯已請辭),結果是爛泥扶唔上壁,畀佢哋揸莊,佢哋卻將區議會變成飲酒作樂嘅夜總會,叫深水埗居民情何以堪?
酒精影響判斷力,所以揸車唔可以飲酒,開會唔可以飲酒,是全世界通行的標準,也是常識。如今何啟明等攬炒派卻公然違反區議員作為公職人員的行為標準,並令到區議會的聲譽受損,呢種人仲點適合做區議員?早就應該執包袱返屋企啦!而作為區議會主席的楊彧處理失當,涉嫌縱容,更應該辭職,並受譴責。
民政事務總署只是發出聲明表示遺憾,促請主席處理事件作出警告和跟進,完全是隔靴搔癢,對深水埗區議會這些散漫狂妄的攬炒議員完全起不了作用。當局應該好好的檢視一下,是否有人違反「區議會條例」或「公職人員行為不當」?如果有,採取實際行動例如扣津貼、進行調查、公開譴責等,比起苦口婆心的勸喻更實際。
深水埗區議會開會飲紅酒嘅荒唐,已經超乎垃圾的級數,令人聯想起商朝紂王和妲己胡天胡帝的酒池肉林。古有紂王荒淫無道,荒廢朝綱;今有攬炒派議員開會飲酒,令香港蒙羞。雖然歲月倥傯相隔了三千多年,但本質上都是一樣的禮崩樂壞,一樣的不知所謂,也將一樣的遺臭萬年。
原圖︰原圖:深水埗監察Facebook、深水埗監察Facebook影片截圖
https://www.facebook.com/110431160886575/photos/a.111570694105955/219163923346631/
https://www.facebook.com/110431160886575/videos/2981365852146486/
投票已截止,多謝支持