博客

博客

「所謂移民「人才外流」和「資金流失」是靠嚇」

施梓山 2021年01月19日 23:30

施梓山:「我經常講,唔想做中國香港人,黃絲要滾便滾,講多無謂,亦無須惋惜。道不同不相為謀,自古皆然。香港嘅繁榮穩定,從來都唔係靠黃絲嘅破壞來維持,更唔係靠港獨黑暴嘅通蕃賣國,而係靠包括香港人在內嘅14億中國人嘅齊心拼搏!所謂移民會為香港帶來「人才外流」和「資金流失」,純屬黃媒靠嚇,一認真大家便輸了!反中亂港者係人辦,唔係人才,垃圾不要也罷。講到資金,一年GPD超過100萬億元人民幣的龐大中國經濟,難道會撐不起一個香港金融中心?黃絲將移民離港吹噓到好似天就快塌下來,咁點解佢哋仲唔滾?」



👇 記得Follow 我哋 👇

IG: instagram.com/silentmajority.hk/

FB: fb.com/silentmajorityhk

Weibo: weibo.com/u/6655322587

Youtube : youtube.com/silentmajorityhk

所謂移民「人才外流」和「資金流失」是靠嚇
 

最近潮流興講乜嘢移民潮,乜嘢「人才外流」、「資金流失」,我也趁下熱鬧。

毋庸諱言,講最近鬧得熱烘烘嘅港人移民問題,離不開也要講吓《國安法》。

眾所周知,這一兩年成日話要移民,成日危言聳聽話移民會為香港帶來「乜乜乜」負面影響嘅人,其實佢哋最大嘅心魔,係來自於去年6月30日正式實施的《港區國安法》。

如果為咗有啲人嘅面子着想,我哋講得好聽,呢次移民潮可以叫「因為了解而分開」。何解?因為有啲人參加完失敗嘅黑暴政變之後,佢哋終於瞓醒,明白香港係中國嘅一部份,唔係佢哋想像中嗰種——香港係西方反華顛覆基地,所以佢哋係因了解而需要去移民。

當然,這當中有些人是出於家庭團聚或其他原因而移民的,另作別論。

但如果講得唔好聽,但實際啲,而家急住去移民嘅一部份人,其實佢哋本身是身有屎或心術不正,才要走得那麼急。行得正,企得正,好人好姐,喺香港做堂堂正正嘅中國人,又唔係通蕃賣國嘅漢奸,《國安法》關我咩事?

有人話係因為怕《國安法》令自己減少或失去自由,所以非移民不可。如果是這樣,咁大家更不應阻住佢發達,相反應該鼓勵佢快啲買機票離開香港,祝佢盡快移民到達佢心目中100%嘅絕對自由民主之地。

有睇開本博客嘅讀者都知道,對於因憂慮所謂「民主自由」和《國安法》而選擇移民離港的人,筆者從來都係嗰幾句——要走就走,早走早着,好行夾唔送!對中國人身份起咗異心嘅人,仲要嚟做乜?

如果真係有骨氣嘅移民,離港之前,就應該自己剪爛本特區護照和香港永久居民身分證,並且簽署文件放棄一切中國籍香港身份,咁先至算係真正嘅移民,否則就唔好成日喺度放屁講乜嘢「移民」!

俗語講,好馬不吃回頭草,去新天地落地生根,自斷返香港食回頭草嘅後路,咁先至算係真正嘅移民,先會真正值得令人尊敬。如果呢頭帶住埋怨離開香港,嗰頭撈唔掂又要返香港食回頭草,再攞香港着數,咁係假移民,得把口,唔該就唔好咁大聲。

對於起咗異心嘅人,留嚟都冇用。呢個世界令人討厭嘅人有好多種,其中一種食兩家茶禮又聲大夾惡嘅人,係最令人看不起的一種。呢種人從來都唔識得寫厚顏無恥四個字,但好不幸,香港有好多呢種人。

仲有一種成日好巴閉大聲同人講:「我有能力走,但其他人點?」嘅人,更令人作嘔。呢種人吹噓嘅「自己有能力」,其實不外乎兩樣東西,一係佢哋自認自己嘅銅臭比其他香港人多,二係佢哋覺得自己嘅職業例如醫護「好尊貴」,就算移民去其他國家都可以搵到食。

呢種人有乜咁令人作嘔?答案好簡單,兩個字:忘本!而且得了便宜仲要賣口乖,更係十足十的冇品。

要培養一個醫生護士,香港納稅人要付出多少稅收?沒有香港人嘅公帑培育,沒有特區政府保護佢哋利益,不開放外地醫護來港,呢班經常以反政府反中國為時髦嘅黃絲醫護,可會輕易就賺取一個月由幾萬到幾十萬元、冠絕亞洲嘅高薪厚職?

香港人投資咗巨額金錢係呢班醫護身上,但到需要佢哋為香港社會服務嘅時候,佢哋不少人就玩拍拍囉柚,移民走去為外國人服務,然後好得戚話自己「有能力走」,你話係咪令人作嘔?

所以我經常提倡,香港未來嘅福利和機會,應該只留返畀、願意留在這邊土地上打拼嘅真正香港人,唔應該再留俾嗰啲擁有外國國籍,但又保留香港身分證嘅人。香港所有的政府公職、公共醫療、免費教育和本地政治的選舉權,將來應全部只給中國籍香港人參與。擁有外國國籍的人,不可以再在香港做公務員,更不能參選或投票。

尤其對於英國人嘅BNO移民分化計劃,中央更應採取果斷反制措施,盡快全面取消承認,並限時要求所有BNO持有人在英籍或中國籍之中二選一,並簽署文件作實。

對於雙重國籍引起的政治效忠缺口,是個很嚴重的潛在問題。藉著清理這次黑暴政變失敗和英國大玩BNO背信棄義的機會,今次一定要大刀闊斧斬斷這個禍患,而且要表明立場,毫不手軟。

我經常講,唔想做中國香港人,黃絲要滾便滾,講多無謂,亦無須惋惜。道不同不相為謀,自古皆然。香港嘅繁榮穩定,從來都唔係靠黃絲嘅破壞來維持,更唔係靠港獨黑暴嘅通蕃賣國,而係靠包括香港人在內嘅14億中國人嘅齊心拼搏!

所謂移民會為香港帶來「人才外流」和「資金流失」,純屬黃媒靠嚇,一認真大家便輸了!反中亂港者係人辦,唔係人才,垃圾不要也罷。講到資金,一年GPD超過100萬億元人民幣的龐大中國經濟,難道會撐不起一個香港金融中心?黃絲將移民離港吹噓到好似天就快塌下來,咁點解佢哋仲唔滾?


原圖:https://std.stheadline.com/realtime/article/1278401/%E5%8D%B3%E6%99%82-%E6%B8%AF%E8%81%9E-%E5%9C%8B%E5%AE%89%E6%B3%95-%E7%A7%BB%E6%B0%91%E6%9F%A5%E8%A9%A2%E5%96%AE%E6%97%A5%E6%80%A5%E5%8D%87-%E4%BB%A530-40%E6%AD%B2%E4%BA%BA%E5%A3%AB%E7%82%BA%E4%B8%BB
https://hk.news.yahoo.com/%E5%9C%8B%E5%AE%89%E6%B3%95-%E8%8F%AF%E9%A7%90%E8%8B%B1%E4%BD%BF%E9%A4%A8%E6%96%A5%E6%94%B9bno%E5%AE%89%E6%8E%92-%E6%9C%89%E9%81%95%E6%89%BF%E8%AB%BE%E5%8F%8A%E5%9C%8B%E9%9A%9B%E6%B3%95-005100398.html

 

 

 

投票已截止,多謝支持

發表意見

排列方式: